“Москвагаас ярьж байна” гэж эхэлдэг “Оросын дуу хоолой” радиогийн монгол хэл дээрх нэвтрүүлэг хаагдаад даруй жил гаруйн нүүр үзэх гэж байна. Нэгэн цагт монголчуудыг мэдээллээр хангаж, гадаад ертөнц дэх цонх болж байсныг бид мэднэ. 1946 оноос буюу 67 жил Монголын радио сонсогчдыг мэдээллээр хангадаг байсан “Москвагаас ярьж байна!” өнгөрсөн 12-р сарын 29-нд хамгийн сүүлчийн дугаараа цацсан. ОХУ-ын эдийн засгийн хямралтай холбоотойгоор түр хаагдсан ч өдий есөн сар болоход дахин нээгдсэнгүй. Энэ нэвтрүүлгийг сонсож дадсан сонсогчид, ялангуяа хөдөөний малчид Москвагийн дуу хоолойг хүлээсээр байгаа ч өнөөдөр энэ нэвтрүүлгийг дахин сэргээх талаар ямар нэг дорвитой хийгдсэн зүйл алга. “Москвагаас ярьж байна” нэвтрүүлэг бол гадаад мэдээг “CNN”, “BBC”, “Ройтерс” гээд барууны эх сурвалжаас авдаг болсон өнөө үед оросуудын байр суурь, тэдний үзэл бодлыг албан ёсоор илтгэдэг цорын ганц суваг байсан гэхэд хилсдэхгүй. Гэтэл 67 жилийн түүхтэй нэвтрүүлэг дуу хоолойгоо барихад манай талаас хэн ч, юу ч гэсэнгүй. Саяхан ОХУ-ын Ерөнхийлөгч В.Путин манайд айлчлахдаа энэ нэвтрүүлгийн хаагдсан талар дурсаад өнгөрснийг хэвлэлүүд онцолсонгүй. В.Путины машин, визний асуудлыг “нухаад” өнгөрлөө. Айлчлалын үеэр В.Путин “Оросын дуу хоолойг” Монголд ахин цацах нь зүйтэй гэж дурдсан юм.
Орос оронтой худалдаа наймаанаас гадна соён гэгээрэл, шинжлэх ухааны салбарт хамтран ажилласан олон жилийн түүх бидэнд бий. Анх Орос орноор гадаад ертөнцийг харж, телевиз, сонин, радио гээд харилцаа холбооны бүх эхлэл Оросоос дамжин манайд нэвтэрсэн. Ийм нандин харилцааны гүүр болсон нэвтрүүлэг бол энэ. Гэтэл Хятадын ЭСЯ-наас монгол хэл дээр өдөр тутам мэдээлэл нийтэлдэг сайтаа тогтмол ажиллуулж байна. Хятадын ЭСЯ монгол хэл дээр гардаг өдөр тутмын мэдээллийг гаргагадаг сайтаа тогтмол ажиллуулж байна. www.mongol.cri.cn сайт Хятадын албан ёсны мэдээллийг өдөр бүр түгээж байна. Орос, Монголын харилцаа ийм "гоё" гээд яриад явахаас илүү хөдөөний иргэдэд хүрдэг оюун санааны харилцааны гүүр болсон нэвтрүүлгийг дахин сэргээхэд манай ССАЖЯ, ГХЯ хоёул анхаарах хэрэгтэй байна.
