Монгол Улсын эрх зүйн шинэтгэлийн хүрээнд шүүх эрх мэдлийн, хууль сахиулах байгууллагын, хүний эрхийг хангах чиглэлээр болон бусад хууль тогтоомжийн төсөл боловсруулж байгаа билээ. Энэ хүрээнд Хууль зүйн яамнаас шийдвэр гүйцэтгэх ажиллагааны шинэчлэлийн бодлогыг боловсруулан “Шүүхийн шийдвэр гүйцэтгэх тухай хууль”-ийг шинэчлэн найруулж байна. Өнөөгийн практикт шийдвэр гүйцэтгэлийн ажиллагаа богино хугацаанд, үр нөлөөтэй хэрэгжих боломж хуулийн холбогдох зохицуулалтын улмаас хязгаарлагдмал байгаа учраас ийнхүү шинэчлэл хийж байгаа юм.

Үүнтэй холбогдуулан Хууль зүйн яам, Европын Сэргээн босголт, хөгжлийн банк, Олон Улсын хөгжлийн хуулийн байгууллага хамтран “Шийдвэр гүйцэтгэх ажиллагааны шинэчлэл” сэдэвт олон улсын эрдэм шинжилгээний хурлыг зохион байгуулах гэж байна. Уг хурлаар шийдвэр гүйцэтгэх ажиллагаанд шинэчлэл хийх шаардлага, хэрэгцээний талаар дотоодын болон гадны мэргэжилтэн, судлаач нар хэлэлцэж олон улсын туршлага солилцох зорилготой. Хурлаар Шүүхийн шийдвэр гүйцэтгэх тухай хуулийн шинэчилсэн найруулгын үзэл баримтлалыг танилцуулах, “Шийдвэр гүйцэтгэх байгууллагын тогтолцоо-шинэчлэл”, “Шийдвэр гүйцэтгэх байгууллагын тогтолцоо, шийдвэр гүйцэтгэгчийн эрх зүйн байдал-шинэчлэл” зэрэг сэдвээр илтгэл хэлэлцүүлэх болно. Мөн хуралд Молдав улсын Шийдвэр гүйцэтгэгчдийн холбооны тэргүүлэгч Роман Талмач, ХБНГУ-ын Бавари муж улсын Шүүхийн академийн захирал асан Вернер Шаллер, БНСУ-ын шүүгч, профессор Жун Жай Хун нар урилгаар оролцох юм.

“Шийдвэр гүйцэтгэх ажиллагааны шинэчлэл” сэдэвт олон улсын эрдэм шинжилгээний хурал 2014 оны 9 дүгээр сар 11,12-ны өдөр Хууль зүйн үндэсний хүрээлэнд 09:00-17:00 цагт болно