Сүүлийн хэдэн жил манай улсын чөлөөт бөхийн эрчүүдийн  суудал өнцөгдөж, сүлд, хийморь нь ёстой нэг доройтсон гэх нийтлэлүүд ар араасаа гарч байсан цаг саяхан.

Иргэд ч чөлөөт бөхийн тамирчдыг оролцсон тэмцээнээсээ ганзага хоосон, гараа санжгануулан ирэх болов гэцгээж байлаа. Хатуухан хэлбэл тэд тив, дэлхий, олимпийн тэмцээнд гадаадын бөхчүүдэд ёстой нэг нухлуулан,  дэвжээний алчуур болж явна гэцгээж байв.
 Тэгвэл дэлхий дахинд бөхийн орон гэж нэрлэгддэг Монголынхоо нэр хүндийг навс унаган, шороотой хутгаж, шилдэг бөхчүүдийн сүүлийг мушгих боллоо гэцгээгдэж байсан чөлөөтийнхөн маань дэлхий дахинд амжилт гаргаад эхэллээ.

Тэр дундаа ихээр шүүмжлэлд өртөөд байсан эрэгтэй тамирчид ч нэр хүндээ буцаан оллоо. Спортод хичээл зүтгэл, чин сэтгэл байхад болдог л юм байна гэдгийг тэд харуулж чадлаа.
Хамгийн сүүлд л гэхэд Узбекийн нийслэл Ташкент хотод болсон Чөлөөт бөхийн насанд хүрэгчдийн ДАШТ-нд манай эрэгтэй тамирчид амжилттай оролцоод ирлээ. 61 кг-ын жинд олон улсын хэмжээний мастер Э.Ням-Очир, 65 кг-ын жинд Гавьяат тамирчин Г.Мандахнаран нар хүрэл медаль хүртсэн. Мөн Э.Бэхбаяр 57 кг-ийн жинд мөнгө, хүрэл медалийн төлөө барилдаан хийж тавдугаар байрт,125 кг-ын жинд олон улсын хэмжээний мастер Ж.Чулуунбат долоодугаар байрт орсон юм.

Энэ ДАШТ үнэхээр Монголчуудын бахдалыг төрүүлж, тамирчдаараа бахархах, омогших сэтгэлийг нь бадрааж өглөө.
Уналтанд ороод байна гэх чөлөөт бөхийнхний “муу” нэр хүндийг ч энэ тэмцээн сэргээж чадлаа.  Улмаар  манай баг зургаадугаар байр эзэлж ирэх онд Дэлхийн цомын төлөө эрэгтэй багуудын тэмцээнд оролццох эрх авсан байна.

Түүнчлэн, чөлөөтийн эмэгтэй тамирчид маань тив дэлхийд нэрээ дуурсгаад байна.  Өнгөрсөн жилийн Унгарын Будапештийн дэвжээнээс Э.Сумьяа, С.Батцэцэг нар мөнгөн медаль хүртсэн бол Т.Мөнхтуяа, О.Насанбурмаа, О.Бурмаа нар хүрэл медаль хүртэж дэлхийн дэвжээнд бахдам амжилт гаргасан. Харин энэ жил С.Цэрэнчимэд  Дэлхийн аварга болж, Төрийн дуулалаа Ташкентийн дэвжээнд эгшиглүүлсэн юм.

Ер нь урлаг, спорт гээд амжилттай яваа бүхний цаана сайхан гэр бүл сайн хань, чадварлаг багш сурган хүмүүжүүлэгч байдаг. Чөлөөтийнхний маань ийм амжилттай яваа нь тэдгээрээс ч шалтгаалж байгаа.

Мөн  МЧБХ-ны тэргүүн дэд ерөнхийлөгч, Улсын аварга Д.Сумьяабазар, түүний дүү их аварга Д.Дагвадорж нар ч чөлөөт бөхийнхний амжилт, ахиц дэвшилтэнд нөлөөлж байна гэж ард иргэд сайшааж байна.