Цагдаагийн байгууллагын бүтэц бүрэлдэхүүн шинэчлэгдэж, удирдлага нь хүртэл солигдоод хэсэгхэн хугацаа өнгөрлөө.

Энэ хугацаанд цагдаатай холбоотой гомдол санал, хэрэг зөрчлүүд ч хэд хэдэн удаа гарлаа. Тухайлбал, энэ сарын 4-нд Баянзүрх дүүргийн нутаг дэвсгэрт Цайз зах Офицеруудын ордон руу уруудаж  явсан  автомашин өндөр настай эрэгтэй хүнийг  мөргөж  гэмээтсэн осол гарсаныг бид мэдээлсэн. Уг ослыг  5333 УБЧ улсын дугаартай  “Grand Mark II” машинтай явж байсан Хэв журмын цагдаа нар гаргасан юм.
Улмаар энэ сарын 10-нд Сэлэнгэ аймгийн Сайхан сум буюу Хөтөл тосгон дахь Цагдаагийн тасагт бүртгэлтэй автомашины жолооч  Сүхбаатар дүүргийн нутаг, Таван буудлын замд 12 настай хүүхэд дайрсан. Талийгаач гарцгүй газраар зам хөндлөн гарч, хичээлдээ явж байсан ч цагдаагийн машин эсрэг урсгалаас нь ирж дайрсан юм. Өөрөөр хэлбэл уг цагдаагийн тэрэгний жолооч У нь тэр үед дуут дохиогоо асаан урсгал сөрөн явж байсан юм.
Тэгвэл ийн зөрчил гаргаж, хэрэг тариад байгаа цагдаа нарынхаа өмнөөс манай ЦЕГ-аас ард иргэдээсээ уучлалт хүсэж, эмгэнэл илэрхийлсээр байгаа.

Хэдийгээр тэднийг ингэж уучлалт гуйснаар нас барсан охин буцаад сэргэж, гэмтсэн иргэн эдгэчихгүй ч цагдаагийн байгууллагын үйл ажиллагаа үнэхээр ард иргэдрүүгээ чиглэсэн, аливаа зүйл дээр уучлалт гуйж, ард иргэдийнхээ өмнө хүлцэнгүй болж байгааг харуулж байгаа юм.
Мөн нөгөөтэйгүүр цагдаагийн  хэвлэл мэдээллийн алба нь ажлаа сайн гүйцэтгэж, ард иргэдрүүгээ хандаж чаддаг болсон нь  өнгөрсөн удаагийн уучлал гуйсан баримт бичгээс тод томруун харагдаж байгаа юм.

Магадгүй хэрэг хийсэн цагдаа нарынхаа өмнөөс уучлалт гуйж эхэлж байна гэдэг цагдаагийн байгууллагад шинэ соёл илэрч буйн нэг жишээ байж болох талтай.

 Хоёрдугаарт Нийслэлийн цагдаагийн газрын даргыг иргэдээс асууж, санал асуулгаар сонгон шалгаруулалтаар сонгох гэж байгаа нь иргэдэд таалагдаж байна.

Цагдаагийн байгууллагын удирдлагууд солигдож энэ мэт шинэ зүйл хийж байгаа нь зарим иргэдээс сайшаал сонсоход ч хүргээд байгаа юм. Эцсийн эцэст цагдаа, салбарын сайд нарын тухай, шинэчлэлийн талаар зөв, буруу хэмээн  ярих хэнд ч хэрэггүй. Гагцхүү бодит амьдрал дээр цагдаагийн байгууллагын хийж гүйцэтгэж байгаа бүхэн харагдаж байх л чухал билээ.