Одоогоос найман сарын өмнө нээлтээ хийж, оршин суугчдаа хүлээн авахад бэлэн болсон “Буянт-Ухаа-1” хорооллын 70 хувьд нь хүн ороогүй байгаа гэнэ. Тодруулбал, одоогоор 150 орчим айл л тус байрыг сонгоод байгаа аж.

Уг нь 1764 айлд зориулсан амьдрах хүсэлтэй хүмүүс олон байгааг албаныхан ч, ард иргэд ч хэлээд байсан. Гэвч иргэдэд хямд орон сууц амлаж байгаа ч тэрнээс илүү хүнд суртал, чирэгдлийг учруулаад байгааг зарим хүмүүс онцолж байна. Учир нь орон сууцийг хуваарилах, урьдчилгаа төлбөрийг авах, гэрээ хийх гээд бүх үйл явц ТОСК-аар дамжиж байгаа. Улмаар өнгөрсөн хавраас эхэлж байрандаа орчих санаатай байдаг хөрөнгөө барьж банк, ТОСК хоёрын хаалгыг сахиж байгаа 1300 орчим иргэн байгаа юм.

Өөрөөр хэлбэл, сугалаагаар шалгарсан иргэдийг 10-хан хоногийн дотор урьдчилгаа мөнгөө бэлдээд л байрандаа орох боломжтой мэтээр ярьж байсан ч хамаг байдаг аргаараа урьдчилгаа олж байрандаа орохыг хүссэн хүмүүсийн амыг банк нь таглаж явуулж эхэлсэн юм. Тэд хашаа, байшин эд хөрөнгөө заран байж олсон урьдчилгаагаараа “юм болгоё” гэсэн ч өнөөдөр байдал хүндхэн байгаа аж. Банкны зүгээс бол “таны орлого хүрэхгүй байна. Зээл өгөх боломжгүй” гэсэн хариултыг өгсөөр иргэдийг буцаагаад байгаа гэнэ.

Тэгвэл энэ бүхэнд ТОСК буюу төрийн орон сууцны корпораци хариуцлага хүлээх хэрэгтэй. Үнэхээр иргэдэд боломжгүй зүйл байсан бол анхнаасаа боломжтой, боломжгүй хүмүүсийн чихэн дээр цэцэг ургуулах хэрэггүй байсан шүү дээ.

Улмаар 8 хувийн зээл банкуудаар зогсонг байдалтай байгаа иргэд гадарласаар байтал ТОСК-ынхан шал өөр зүйл ярьж явна. Тэднийхээр бол долоо хоногт 100 орчим хүний банкны шийдвэр гарч байгаа гэнэ. Гэвч энэ нь бодит байдал дээр тэс өөрөөр эргэж байгаа юм.

Банкууд 8 хувийн зээлээс татгалзаж эхэлж байгаа гэх яриа ч гарсан. Тэгвэл энэ нь бодит байдал дээр ч анзаарагдаж эхлээд байгаа юм. Одоо бол ганц, нэгхэн банк маш бага хэмжээгээр  зээл гаргаж байгааг иргэд хэлж байна.

Цаашлаад уг байрыг хэнд ч зарахгүй, ченжүүдийн гарт оруулахгүй гэж байсан ч одоо нөхцөл байдал өөрчлөгдөж, 160 гаруй байрыг бэлэн мөнгөөр худалдахаар болсон. Бүр тодруулбал, төлбөрөө төлөөгүй иргэдийн 100 орчим байр, төрийн албан хаагчдад хуваарилсан 62 байрыг бэлэн мөнгөөр худалдаж авах хүнд нь өгнө гэдгээ зарласан. Тэгвэл энэ нь мөнгөтэй, танил талтай хүмүүст боломж олгож байгааг харуулж буй хэрэг бус уу.

Юутай ч ард түмний толгойг эргүүлж, болхи бохир аргаар ажил үйлчилгээ явуулдаг ТОСК-д гомдолтой байгаа иргэдийн тоо нэмэгдсээр байна.

Төр засаг ч ийм байдлаар иргэдээ хуурсаар байх уу?.