“Ийгл” телевизийн гадаад тоймч Ш.Гантулгын эфирт гарах эрхийг нь хассан тухай мэдээлэл сүүлийн үед хэвлэл мэдээллийн хэрэгслээр гараад байгаа. Уг мэдээллийг үнэн болохыг тоймч Ш.Гантулга өөрөө баталсан. Тэрбээр хэд хоногийн өмнө “Ийгл телевизэд хавчигдахад миний мэдлэг нөлөөлсөн” гэж ярьсан. Тэгвэл тэрбээр өнөөдөр “Монгол улсад цензур гэгч зүйл бий болж гэдэг нь л тодорхой боллоо. Гэхдээ тэр нь манай ард түмний ашиг сонирхолтой ямар ч хамаагүй. Ямарваа нэгэн гадны этгээд юм уу, тэдэнтэй нийлсэн элит хүмүүсийн эрх ашигт л үйлчилдэг юм болов уу. Яагаад гэвэл долдугаар сарын 17-ны өдөр Малайзын иргэний агаарын тээврийн нисэх онгоц пуужинд оногдоход ОХУ энэ асуудалтай холбоотой гэсэн үзэл суртлын шинж чанартай нэвтрүүлгийг манай телевиз цацаж байсан. Тэр үед нь би “Оросуудыг энэ хэрэгт буруутай гэж үзэх ямар ч баримт байхгүй” гэж хэлсэн юм. Иймэрхүү мэдээлэл гаргах нь удахгүй манай улсад айлчлах гэж байсан ОХУ-ын Ерөнхийлөгч В.Путины айлчлалд тодорхой хохирол учруулж болзошгүй байсан. Монголчуудад хор болох зүйлийг хэлэхээс татгалзсаныхаа төлөө эфирт гарах эрхээ хасуулсан. Манай телевизийн захирал болон ТУЗ-ын ноёд арай өөр бодолтой байх шиг байна. Гадаадын банкинд мөнгөө хадгалуулдаг хүмүүсийн толгойд жирийн иргэдийн үндэсний эрх ашгаас огт өөр зүйл байдаг байх” гэж ярилаа.

Ямартай ч тэрбээр энэ үгээрээ “Ийгл” телевизийг баруунийхны гар хөл болж ажилладаг гэдгийг олон нийтэд зарлаад авлаа.