Мэргэжлийн хяналтын ерөнхий газрын Хүнсний аюулгүй байдлын үндэсний лавлагаа лаборатори /ХАБҮЛЛ/-ийн ерөнхий захирал Б.Амар болон нэр бүхий ажилтнууд  Бүгд Найрамдах Социалист Вьетнам Улсын Эмийн үндэсний чанарын хяналтын хүрээлэнд сургалтад хамрагдлаа.  

Үүний дүнд тус улстай эмийн чанарын хяналтын болон эм биобэлдмэлийн хяналтын лабораторийн хамтын ажиллагааг хөгжүүлэх, шинжээчдийн ур чадварыг сайжруулах, сургалтад хамруулах чиглэлээр хамтран ажиллахаар боллоо.

ХАБҮЛЛ-ын төлөөлөгчид БНСВУ-ын Эрүүл мэндийн яамны Эмийн үндэсний чанарын хүрээлэнгийн бүтэц, зохион байгуулалт, удирдлага, мэдээллийн тогтолцоо, санхүүжилт, итгэмжлэл, тус улсын эм үйлдвэрлэгч “Traphaco Joint Stock”компанийн ажилтай танилцсан байна.

Эмийн үндэсний чанарын хяналтын хүрээлэн нь 1957 онд байгуулагдсан. Есөн лаборатори, долоон хэлтэс, хоёр төв, 179 ажилтан, албан хаагчтай, улсын хэмжээний томоохон байгууллага юм. Тус хүрээлэн улсын хэмжээнд сүлжээ хэлбэрээр ажилладаг бөгөөд орон нутгийн 62 лабораторийг мэргэжил, арга зүйгээр удирддаг байна.

Эм үйлдвэрлэгч “Traphaco Joint Stock”компани нь ургамлын гаралтай 230 гаруй нэр төрлийн, түүний дотор зүрх судас, хоол боловсруулах систем, төв мэдрэлийн  болон өвчин намдаах эм, арьс арчилгаа, гоо сайхны бүтээгдэхүүн үйлдвэрлэдэг юм.

Сургалтыг Монгол Улсын Засгийн газар, Азийн хөгжлийн банкны хооронд байгуулсан “Эрүүл мэндийн салбарын хөгжил, хөтөлбөр-4” төслийг хэрэгжүүлэх буцалтгүй тусламжийн гэрээний хүрээнд зохион байгуулжээ. Сургалтад шаардагдах бүх зардлыг Азийн хөгжлийн банк гаргасан байна.