ОХУ болон БНХАУ-аас хамтран хэрэгжүүлэх “Талын зам” төслийг манай газар нутгаар дамжуулан хийх төлөвлөгөөтэй байгаа. "Талын зам” төслийн хүрээнд өмнөд, хойд хөршийг холбосон 997 км хурдны авто зам тавих, 1100 км эрчим хүчний шугам барих, Транс-Монголын төмөр замыг өргөтгөх, байгалийн хий болон газрын тос дамжуулах хоолой барих юм. Дээрх таван төслийг нэгтгэсэн “Талын зам” төсөлд нийт 50 тэрбум ам.доллар хэрэгтэй гэсэн урьдчилсан тооцоо гараад байгаа аж.

Энэхүү төсөл хэрэгжсэнээр хөрөнгө оруулалт нэмэгдэж, орон даяар бүтээн байгуулалт өрнөж, эрчим хүч, уул уурхайн салбарын хөгжил шинэ түвшинд гарна гэж Засгийн газар үзэж байгаа юм. “Хөрөнгө оруулалт өссөнөөр дотоодын нийт бүтээгдэхүүний хэмжээ үлэмж тэлэх нь ойлгомжтой. Эцсийн үр дунд Монгол Улсын эдийн засаг түүхий эдийн экспортын хамаарлаас гарч, олон улсын худалдаанаас ашиг олдог болно” гэж суддаачид дүгнэж байгаа юм.

ОХУ, БНХАУ-д байгалийн хий, газрын тос нийлүүлэх гэрээ хийснээр 2020 онд гэхэд худалдааны эргэлт нь 200 тэрбум ам.долларт хүрэх тооцоо бий. Хоёр хөршийн худалдааны эргэлт 2012 онд 90 тэрбум ам.доллар байсан. Дээрх төслүүдийг хэрэгжүүлснээр манай улс хоёр хөршийнхөө гадаад худалдаанаас зохих хувиа хүртэх аж.