Иргэн Т.Мөнх-Оргил нь Хотын дарга Э.Бат-Үүлийг жиргээчдийн нэр хүндэд халдсан хэргээр шүүхэд өгсөн талаарх мэдээлэл хэвлэл мэдээллийн хэрэгслүүдээр гарсан. Тодруулбал, Хотын дарга Э.Бат-Үүл хэвлэлд өгсөн ярилцлагадаа жиргээчдийг лаларууд гэж хэлсэн байдаг. Тиймээс Т.Мөнх-Оргил нь нийт жиргээчдийнхээ нэр хүндийг сэргээх цаашлаад ийм үйлдлийг дахин гаргуулахгүйн тулд Э.Бат-Үүл даргын эсрэг гомдлыг Дүүргийн анхан шатын нэгдүгээр шүүхэд гаргасан гэдэг.

Уг асуудлаар жиргээч Т.Мөнх-Оргилтой ярилцлаа.

-Та Хотын дарга Э.Бат-Үүлийн эсрэг гомдлыг шүүхэд өгсөн. Уг хэрэг ямар шатандаа явж байна вэ?

-Миний нэхэмжлэлийг Хотын дарга Э.Бат-Үүлд танилцуулсан байгаа. Харин Э.Бат-Үүл дарга ямар хариу хэлсэн нь тодорхойгүй байна.

-А.Гансүх сайд Ц.Бат инженерийг өөрийнх нь нэр хүндэд халдсан хэргээр шүүхэд өгсөн. Тэрбээр уг үйлдлээрээ зөв жишиг тогтоосон гэж ярьж байгаа. Яг үүнтэй адил та хотын даргыг шүүхэд өгснөөрөө ямар нэгэн зөв жишгийг тогтоож байна гэж үзэж байна уу?

- Төрийн албан хаагч ард иргэдийн амыг барих гэж оролдож байна шүү дээ. Үүний эсрэг би тэмцэж байна.  Э.Бат-Үүл даргад юу бодогдож байгааг би мэдэхгүй. Харин илэрч байгаа хэлбэр нь “Энэ хүмүүс болохгүй байна. Жиргээчдийг хавчих хэрэгтэй байна. Нийгмээс ялгаварлан гадуурхах хэрэгтэй байна” гэж харагдаж байна. Учир нь “Бидний үед тиймэрхүү хүмүүсийг лаларууд гэдэг байсан. Одоо та нар юу гэж нэрлэхээ өөрсдөө мэдэцгээ. Тэгээд тэр хүмүүсийг нийгэмд ямар нэгэн ажил хийх, эрх мэдэлтэй байхыг нь зогсоо” гэсэн утгатай үг хэлээд байна шүү дээ. Тэгэж болохгүй. Э.Бат-Үүл ард иргэдийнхээ нэг хэсгийг  ингэж ялгаварлаж болохгүй. Түүнээс би хэр барагийн үгэнд гомдоод байдаг хүн биш. Хамгийн гол нь цаадах санааг нь олж харчихаад тэмцээд байгаа юм.

- Зарим хүмүүс таныг ямар жижиг асуудлаар хөөцөлддөг завтай хүн бэ гэж хэлж магадгүй?

-Асуудал байна. Гэхдээ би асуудлын цаадах учрыг олж харчихаад яваад байгаа юм. Ардчилагчид чинь  өөрсдөө эргээд ардчилалаа нухчин дарах гээд байна шүү дээ.

- Таны зорилго Э.Бат-Үүл даргаас уучлал гуйлгах. Тийм үү?

-Тийм. Э.Бат-Үүл дарга нийт жиргээчдээс уучлал гуйх ёстой. Би Э.Бат-Үүл даргыг их үнэлдэг байсан. Харин одоо үнэлэмж буурсан. Э.Бат-Үүл дарга “Би юм хийж байна. Та нар дуугүй сууж бай” гэх гээд байх шиг байна. Тэр хүнд тийм эрх байхгүй. Тэр дундаа нэг хэсэг хүмүүсийг лаларууд гэж дуудах эрхгүй юм.

- Та ямар мэргэжилтэй хүн бэ?

- Уул уурхайн инженер, удирдлагаар төгссөн. МУИС болон ШУТИС-т сурсан. Мөн Америкт хоёр жил суралцсан. 2011 оноос жиргэж байгаа.

- Таны энэ үйлдлийг жиргээчид дэмжиж байгаа юу?

-Зарим нь дэмжиж байгаа. Ингэж байж л хүмүүнлэг ардчилсан нийгэм бүрдэнэ гэж үзэж байгаа хүмүүс бий.