ЗХЖШ-ын дарга, дэслэгч генерал Ц.Бямбажав БНЭУ-ын Хуурай замын цэргийн штабын дарга, дэслэгч генерал Далбир Сингхийн урилгаар тус улсад албан ёсны айлчлал хийж байна.Дэслэгч генерал Ц.Бямбажав дагалдан яваа бүрэлдэхүүний хамтаар Amar Jawan Jyoti буюу Дайнд амь үрэгдсэн дайчдын дурсгалын цогцолборт цэцэг өргөснөөр албан ёсны айлчлал эхэллээ. Цэцэг өргөсний дараа тус улсын Батлан хамгаалах яамны төв байранд хүрэлцэн очиж, БНЭУ-ын Хуурай замын цэргийн штабын дарга, дэслэгч генерал Далбир Сингхтэй албан ёсны уулзалт хэлэлцээ хийлээ.
Уулзалтын үеэр дэслэгч генерал Ц.Бямбажав хоёр орны цэргийн штабын хамтын ажиллагаанд сэтгэл хангалуун байгаагаа илэрхийлээд цаашид уламжлалт чиглэлүүдээс гадна боломжит шинэ чиглэлүүдээр өргөжүүлэн хөгжүүлэх сонирхолтой байгаагаа илэрхийлсэн бол Генерал Далбир Сингх дэслэгч генерал Ц.Бямбажавтай санал нэг байна гээд, хамтын ажиллагааг гүнзгийрүүлэн хөгжүүлэх тал дээр өөрийн зүгээс шаардагдах бүх арга хэмжээг авч хэрэгжүүлнэ гэдгээ амласан юм.
Мөн дэслэгч генерал Ц.Бямбажав Батлан хамгаалахын Нарийн бичгийн дарга Шри Р.К.Матуртай уулзаж хамтын ажиллагааны талаар санал солилцлоо. Өнө удаан жилийн түүхэн харилцаатай хоёр орны батлан хамгаалах салбарын хамтын ажиллагаа өргөжин тодорхой үр дүнд хүрээд байгаа бөгөөд цаашид тодорхой чиглэлүүдээр ажиллах хүсэлтэй байгаагаа талууд илэрхийлсэн юм. Нарийн бичгийн дарга Матур эелдэг үгэнд баярласнаа хэлээд боломжтой бүхий л чиглэлээр хамтын ажиллагааг хөгжүүлэх хүсэлтэй явдгаа тэмдэглэн хэлсэн.
Дэслэгч генерал Ц.Бямбажав айлчлалын хоёр дахь өдөр Пуне хот дахь Цэргийн инженерийн сургууль, Цэргийн тагнуулын сургалтын төвөөр айлчилж, Өмнөд командлалын командлагчтай уулзаж санал солилцлоо.
