Прокурорын байгууллагын үйл ажиллагааг олон нийтэд хүргэх, шүүх эрх мэдлийн шинэтгэлийг гүнзгийрүүлэх хөтөлбөрийн хүрээнд батлагдсан тодорхой төрлийн хуулиудыг сурталчлах, гэмт хэргээс урьдчлан сэргийлэх ажлын хүрээнд Завхан аймгийн Прокурорын газраас санаачлан аймгийн Гэмт хэргээс урьдчилан сэргийлэх салбар зөвлөлтэй хамтран “Нээлттэй хаалганы өдөрлөг”-ийг 2014 оны 09 дүгээр сарын 19-ны өдөр Завхан аймгийн Ургамал, Эрдэнэхайрхан, Дөрвөлжин, Завханмандал сумдыг хамруулан Ургамал суманд зохион байгуулан ажилласан байна.

Уг нээлттэй хаалганы өдрөөр Шүүх, Цагдаа, Шүүхийн шийдвэр гүйцэтгэх алба, Мэргэжлийн хяналтын газрын улсын байцаагч, бусад албан хаагчид, иргэдийг урьж оролцуулан Прокурорын байгууллагаас хэрэгжүүлж буй үйл ажиллагааг танилцуулж, аймгийн 2013 он, 2014 оны эхний 08 сарын байдлаар хяналтын ажлуудын чиглэлээр болон гэмт хэргээс урьдчилан сэргийлэх ажлын чиглэлээр хийж гүйцэтгэсэн ажил, захиргааны зөрчил, эрүүгийн нөхцөл байдалд хийсэн дүн шинжилгээ, цаашид авч хэрэгжүүлэх арга хэмжээний талаар танилцуулж, иргэд, байгууллагын санал, хүсэлт, гомдлыг хүлээн авчээ.

Энэ үеэр аймгийн Прокурорын газраас Хууль эрх зүй, таних мэдэхүйн “АХА”, ая дууны “Караоке” тэмцээнүүдийг харьяа сумдаас ирсэн иргэдийг оролцуулан зохион байгуулж, Эрүүгийн хуулийн тусгай ангийн холбогдох зүйл заалт, Гэмт хэргээс урьдчилан сэргийлэх тухай хуулийн холбогдох зүйл заалт, Гэр бүлийн хүчирхийлэлтэй тэмцэх нь, Мал хулгайлах гэмт хэрэгтэй тэмцэх нь, Тамхины хяналтын тухай хууль, Ойн тухай хууль, Архидан согтууруулахтай тэмцэх тухай хууль,  2014 оны эхний 08 сарын байдлаар эрүүгийн нөхцөл байдал зэрэг 400 гаруй санамж, боршюр, гарын авлага, зөвлөмжийг арга хэмжээнд оролцсон  218 хүнд тарааж,  гэмт хэрэг, зөрчлөөс урьдчилан сэргийлж, хууль сурталчлан ажиллажээ.