Өнгөрсөн зургадугаар сарын 6-наас эхлэн  Толгойт өртөөнөөс Амгалан чиглэлд “Railbus” үйлчилгээнд явж эхэлсэн. Тухайн үед сүр дуулиантайгаар нээлтээ хийж, зөв шийдэл, хөгжил дэвшил мэтээр эрх баригчид тайлбарлаж байсан. Өөрөөр хэлбэл, “Railbus” үйлчилгээнд гарсанаар иргэдэд түргэн шуурхай хүрч үйлчилж, олон нийтийн санааг хамгийн ихээр түгшээж, нийгэмд стрессийг үүсгэдэг замын түгжрэлийг бууруулна гэдгийг ч албаныхан дуу нэгтэйгээр хэлээд байсан.  Гэвч эрх баригчдын магтаж сайшаагаад байсан “Риалбус” үйлчилгээнд гараад гурван сар гаруй хугацаа өнгөрсөн ч өнөөдрийг хүртэл үйлчлүүлэгчээ татаж чадаагүй, алдагдалтай ажилласаар байгаа юм. Тодруулбал нэг удаадаа 340 хүнд үйлчлэх боломжтой “Railbus”-аар өдөрт  30-40 хүн ч үйлчлүүлэхгүй байгаагаас ийн алдагдалд ороод байгааг бид мэдээлж байсан билээ.

 Иймээс энэхүү төмөрзамын автобус цаашид энэ хэвээрээ ажиллавал алдагдал нь улам нэмэгдэх ойлгомжтой. Тиймээс алдагдал нэмэгдэж эхлэхээс өмнө “Риалбус”-ыг татан буулгаж, үйлчилгээнд гаргахгүй байхаар болж байгааг зарим эх сурвалжууд онцолж байсан. Гэвч Нийслэлийн засаг дарганы орлогч Н.Гантөмөр “”Railbus”-аар өдөрт 40-100 хүн л үйлчлүүлж байгаа. Тэгэхээр бид үүнээс олон хүнд үйлчилдэг болгохын тулд цаашид салаа зам тавиад автомашин, галт тэрэг нэг төвшинд явдаг болгохоор төлөвлөсөн байгаа. Өөрөөр хэлбэл, автомашин дээгүүр нь явж байхад, галт тэрэг доогуур нь явж байх юм. Ингэснээр үйлчлүүлэгчид олон болж, ашиг орлого ч нэмэгдэх” юм гэх зүйлийг ярьжээ.

Өөрөөр хэлбэл, алдагдал хүлээсэн ч энэ ажлыг үргэлжлүүлнэ гэдгийг албаныхан хэлж байна.

Харин иргэдийн хувьд салаа зам тавьж болно гагцхүү “Railbus”-аа арай хол чиглэлд явуулж, тасалбарынх нь үнэ өртөгийг багасгаж, өртөө буудал дээр нь анхаарлаа хандуулах хэрэгтэй гэцгээж санаа оноогоо цухалзуулж байгаа юм.

Юутай ч амьдралаа авч явахаар, хоосон хонохгүйн төлөө зүтгэж байгаа энгийн иргэдийн хувьд эдийн засгийн хямрал маш хүчтэйгээр нөлөөлөөд байгаа энэ үед 3,9 сая доллараар уг “Railbus”-ыг авсан. Гэвч энэ нь автозамын түгжрэлийг сааруулж ажлын бүтээмжийг нэмэгдүүлнэ  хэмээж байсан ч ийн  талаар өнгөрч байх шиг байна. Мөн иргэдэд нийцсэн, нийгэмд хэрэгтэй зүйл болно гэж байсан ч эсрэгээрээ түгжрэл, осол аваар, иргэдийн бухимдлыг улам ихээр нэмэгдүүлсэн зүйл болж хувирсаныг хүн бүр хэлээд байгаа билээ.

 Цаашлаад иргэдийг 3000 төгрөгөөр зорчуулж байж ашигтай ажиллана хэмээн тооцоолсон албаныхан жирийн иргэдийнхээ амьдралын төвшинг хараахан  судлаагүй бололтой. Харин салаа зам тавьж “Railbus”-аа идэвхжүүлсэний дараа энэ үнэ хэр өсөх нь одоогоор тодорхойгүй байна.

Үйлчилгээнд явж эхлээд олигтой орлого ч олж чадаагүй “Риалбус”-аас болж Улаанбаатар төмөр зам 28 сая төгрөгийн алдагдал хүлээгээд байгаа гэх албаны бус тоо баримт байна.