2012 оны 12 сарын 26-ний өдрийн УИХ-ын тогтоолоор Өмнөговь аймгийн Гурвантэс суманд Сум дундын 2 дугаар прокурорын газрыг байгуулахаар шийдвэр гарсан байна.Тус суманд Шүүх байгуулагдахгүй өнөөдрийг хүрсэн нь сум дундын прокурорын газрыг байгуулан ажилуулах боломжгүй болгож байна.
Гэвч Гурвантэс суманд хүн амын нягтаршил болон үйл ажиллагаа явуулж байгаа аж ахуй нэгж, компаниуд жил ирэх тусам нэмэгдэж хэргийн гаралт өсөж байгаатай холбогдуулан аймгийн прокурорын газраас 2014 оны 9 дүгээр сарын 15-наас эхлэн мөрдөн шалгах ажиллагаанд хяналт тавих хяналтын прокуроруудыг томилолтоор сар бүр ээлжилж ажилуулахаар болж, эхний ээлжийн прокуророор хяналтын прокурор С.Мөнхтулга томилогдон орон нутгийн байдалтай танилцаж ажлаа эхлүүлсэн байна.
Гурвантэс суманд прокурор ажиллах болсонтой холбогдуулан тухайн суманд үйл ажиллагаа явуулж буй сум орон нутгийн удирдлага, Цагдаа, Хилийн цэргийн дугаар анги, Хилийн мэргэжил хяналтын газар, Гаалийн байгууллагын удирдлагатай уулзалт хийж прокурор ажиллах болсныг танилцуулсан байна.
Өмнөговь аймгийн болон Гурвантэс сумын засаг даргын тамгын газраас прокурорын ажиллах албан өрөө, амьдрах байрыг шийдвэрлэж цаашид дэмжин ажиллахаа илэрхийлсэн байна.
