П.Н.Шастины нэрэмжит Улсын гуравдугаар төв эмнэлэг үүсгэн байгуулагдсаны 60 жилийн ой болж байна. Тэртээ 1954 онд Төв больницоос салбарлан бие даасан эмнэлэг болон галаа асаасан “3-р эмнэлэг”-ийн үе үеийн бүтээлч, хөдөлмөрч хамт олны идэвх зүтгэлийн ачаар өнөөдөр тус эмнэлэг “Үндэсний хэмжээний лавлагаа төв эмнэлэг ” болтлоо хөгжсөн байна.

60 жилийн ойн хүндэтгэлийн арга хэмжээнд Эрүүл мэндийн сайд Н.Удвал, УИХ-ын гишүүн С.Одонтуяа, Улсын гуравдугаар төв эмнэлгийн дарга Ц.Төмөр-Очир болон холбогдох албаны хүмүүс, тус эмнэлгийн үе үеийн ажилтан, албан хаагчид оролцлоо. Эрүүл мэндийн сайд тус хүндэтгэлийн арга хэмжээнд үг хэллээ. Тэрээр, “Эмнэлэг үүсгэн байгуулагдсан 60 жилийн ойг тохиолдуулан тус эмнэлгийн тулгын чулууг тавилцсан ахмад буурлууд, хөгжил дэвшилд хөтөлсөн, үнэтэй хувь нэмэр оруулсан үе, үеийн удирдлагууд, эмч, эмнэлгийн ажилтнууд, эрдэмтэн багш та бүхэнд энэхүү түүхт ойн баярын мэндийг дэвшүүлж, хүн ардынхаа эрүүл энхийн манаанд зогсох их үйлсэд нь өндөр амжилт хүсч, эрүүл энхийг хүсэн ерөөе. Шинэчлэлийн засгийн газар байгуулагдсанаас хойш 3-р эмнэлэгт 6 тэрбум төгрөгийн хөрөнгө оруулалтаар мэс заслын болон эрчимт эмчилгээний тоног төхөөрөмжийг шинэчиллээ. Эмнэлгийн их засварт зориулж 4 тэрбум төгрөгийг сайдын багцаас гаргасан. Үйлчилгээний соёл, сэтгэлд нийцсэн найман үйлчилгээг хамгийн сайн хэрэгжүүлж байгаа эмнэлэг бол танайх. Үйлчлүүлэгч төвтэй, бүх шатандаа хариуцлагатай, хяналттай, эмч, эмнэлгийн ажилтнууд өндөр ёс зүйтэй, чанартай, аюулгүй тусламж, үйлчилгээг үзүүлж, монгол хүн бүрээ эрүүл байлгахын төлөө зүтгэж, өмнө тавьсан зорилгоо амжилттай хэрэгжүүлэхэд хамтдаа урагшаа гэж та бүхнээ уриалж байна” гэлээ.

Түүнчлэн сайд ажил хөдөлмөрөөрөө хамт олноо манлайлсан зарим ажилтан, албан хаагчдыг шагнаж, урамшууллаа.

Тус эмнэлэг өнөөдөр 707 ажилтантай, 42 тасаг, нэгж, албадаар дамжуулан эмнэлгийн тусламж, үйлчилгээг 430 ортойгоор 17,273 өвчтөн хэвтүүлэн эмчилж, 152,203 хүнд амбулаторийн төрөлжсөн мэргэжлийн үзлэг оношилгоог хийж, хамгийн сүүлийн үеийн тоног төхөөрөмжөөр нийт 67,420 хүнийг оношлон, 5484 хүнд мэс заслын тусламж, үйлчилгээ үзүүлдэг үндэсний хэмжээний төрөлжсөн мэргэжлийн лавлагаа төв болоод байна.

Цаашид тус төвийн хамт олон хүн амын хэрэгцээнд нийцсэн хүртээмжтэй, эрүүл мэндийн тусламж, үйлчилгээг үзүүлдэг • “сэтгэлд шингэсэн эмнэлэг”;

• “дэлхийн түвшний төрөлжсөн мэргэжлийн лавлагаа, тусламж, үйлчилгээ”;

• “эрсдэлгүй, аюулгүй, тусламж, үйлчилгээ”;

• “эрүүл мэндийн үйлчилгээний цахим карт”;

нэвтрүүлсэн байгууллага болох зорилтуудыг тавин ажиллаж байгаа ажээ.