Дархан-Уул аймагт хүүхдүүд олноор хордож эмнэлэгт хүргэгдсэн талаар бид мэдээлсэн. Дархан сумын VII цэцэрлэгийн багачууд өнгөрсөн лхагва гарагаас халуурч, суулган, эцэг эхчүүд нь пүрэв гарагийн өглөөнөөс аймгийн Нэгдсэн эмнэлэгт хандаж эхэлсэн юм. 100 гаруй хүүхэд эмнэлгийн тусламж авсан бөгөөд 35 нь хэвтэн, үлдсэн нь гэрээр эмчлүүлж байгаа аж.

Хүүхдүүд юунаас хордсон болохыг тогтоохоор Мэргэжлийн хяналтын байцаагч шалгалт, шинжилгээг хийсэн бөгөөд шинжилгээний хариу өнөөдөр гарах юм байна. Гэвч урьдчилсан байдлаар 100 гаруй хүүхдэд хордлогын шинж тэмдэг илэрсэн бөгөөд гэдэсний хурц халдварт өвчний шинж тэмдэгтэйгээр эмчлүүлж эхэлжээ.

Албаны мэдээллээр аймгийн Мэргэжлийн хяналтын улсын байцаагч нар энэ сарын 23-25-ны өдрүүдийн өглөө, өдрийн хоол, 24 нэр төрлийн бүтээгдэхүүний дээж болон багш, ажилчид хоолны газар зэргээс 90 арчдасын шинжилгээ авч лабортарид хүргүүлсэн байна.

Одоогийн байдлаар  зургаан хүүхдийн бие хүндэвтэр байгаа аж.  Зарим хүүхдүүд хордлогоосоо болоод шоконд орчихсон байгаа гэв. Цэцэрлэгийн хүүхдүүдийн эцэг, эхийн үзэж буйгаар цэцэрлэгийн байр зориулалтын бус орчинд хүүхэд байлгаснаар эрүүл ахиун шаардлага алдагдсан байж мэднэ гэх таамгийг дэвшүүлээд байгаа гэнэ.

Мөн иргэдийн хэлж буйгаар тухайн өдөр хүүхдүүд гоймонтой шөл идсэн байна.

Ийнхүү бага насны хүүхдүүд бөөн бөөнөөрөө хордсон тохиолдол хоёр дахь удаагаа гарч байгаа юм. Одоогоос хэдхэн хоногийн өмнө Өмнөговь аймгийн Ханбогд сумын сургууль, цэцэрлэгийн 69 хүүхэд хоолны хордлого авч байсан. Эдгээр хүүхдүүд гэдэсний бүлгийн савханцараар өвчилсөн болохыг албаныхан тогтоосон билээ.

Гэтэл хүүхдүүд хордлого авсан тохиолдол ийн Дархан-Уул аймагт хоёр дахь удаагаа бүртгэгдлээ.

Үүнийг холбогдох албан тушаалтнууд хяналтандаа авч ажиллахгүй бол бяцхан үрс маань хоолны хордлогооос угшилтай суурь өвчлөлтэй болж мэдэхээр байна.