БНСУ-ын Инчон хотод болж буй Азийн спортын наадамд Монголын тамирчид супер амжилт гаргаж эх орон, элэг нэгтнүүдээ баярлуулж байна. Ганц жишээ дурдахад манай сагсан бөмбөгийн эмэгтэй, эрэгтэй шигшээ багийнхан Монголын сагсан бөмбөгийн хөгжил шинэ шатанд гарсан гэдгийг тод харуулж чадлаа. Гэтэл сайны хажуугаар саар гэгчээр тус наадмын зохион байгуулалттай холбоотой маш олон санал, гомдол гарсан талаар янз бүрийн яриа гарч буй. Тодруулбал, тэмцээний үеэр Монгол улсын далбааг уруу нь харуулж байрлуулсан мөн эмэгтэй жүдочдын хоолонд бохир зүйл /эмэгтэй хүний хэрэглэсэн ариун цэврийн хэрэгсэл/ хийсэн цаашлаад зарим тэмцээний төрлүүдийг мэдээлэхдээ Монголын хүн амын тоог буруу, зөрүү гаргасан, Монголыг Хятадын Хонг конг, Макаотой ижил ойлгогдохоор бичсэн зэрэг алдаа гаргасан юм.

Тэгвэл энэ бүх мэдээлэл үнэн болохыг Инчон азийн спортын наадмын Монголын багийн ахлагч УИХ-ын гишүүн Б.Бат-Эрдэнэ баталлаа.
Тэрбээр “Монголын жүдо бөхийн эмэгтэй тамирчдыг багийн барилдаанд орохын өмнө буюу бэлтгэлийн зааланд байх үед хоолонд нь бохир зүйл хийсэн нь үнэн. Бид тэр даруй нөхцөл байдлыг баримтжуулж, холбогдох хүмүүст зохих журмын дагуу гомдол гаргасан. Улмаар Монгол улсаас Бүгд найрамдах Солонгос улсад суугаа Элчин сайдын яамнаас БНСУ-ын яамаар дамжуулан Азийн наадмыг зохион байгуулах хороонд яаралтай ноот бичиг явуулсан байгаа” гэж хэллээ.

Монгол улсын төрийн далбааг буруу байрлуулсан хэргийн хувьд ч мөн гомдол гаргаад байгаа аж. Далбаа солигдсон нь Төв стадионд биш, олимпийн тосгонд биш харин дарвуулт завины тэмцээн болж байгаа газарт болсон байна. Энэ нь техникийн ажилтны буруугаас болсон бөгөөд зохион байгуулагчдын зүгээс уучлалт гуйжээ.
Мөн бусад асуудлаар ч холбогдох газарт нь гомдол гаргаж, асуудлыг шалгуулж байгаа юм байна. Эмэгтэй тамирчдын хоолноос бохир зүйл гарсан асуудлыг одоо шалгуулж байгаа бөгөөд эхний ээлжинд уучлалт гуйлгуулаад байгаа аж. Монголын тамирчид болоод ард иргэдийн зүгээс уг асуудлын үнэн зөвийг олж жигшмээр үйлдэл гаргасан буруутанд хариуцлага хүлээлгэх ёстой гэсэн байр суурьтай байна. Мөн тэмцээнийг зохион байгуулагчид Монголын ард түмнээс уучлалт гуйх ёстой гэж байгаа юм.