Дүүргийн 3 дугаар прокурорын газраас Багануур дүүргийн Хөдөлмөрийн хэлтэс, Нийгмийн даатгалын хэлтэс, Цагдаагийн хэлтсүүдтэй  хамтран 2014 оны 09 дүгээр сарын 15-ны өдөр “Нийслэлийн гэмт хэргээс урьдчилан сэргийлэх ажлыг зохицуулах зөвлөл, Нийслэлийн прокурорын газраас гэмт хэргээс урьдчилан сэргийлэх ажлын хүрээнд 2013-2016 онд хамтран хийх ажлын хөтөлбөр”-ийн дагуу хэрэгжүүлж байгаа ажлын хүрээнд Хорих ангиас суллагдсан хүмүүс болон хорих ял нь тэнсэгдсэн ялтнуудын ажил эрхлэлтийн байдлыг тооцож, ажил хийх сонирхолтой, хөдөлмөрийн чадвар, чадамжтай этгээдийг хөдөлмөрт хамруулах, тэдэнд мэдээлэл өгөх ажлыг зохион байгуулсан байна.

Үүнд:

 1. Дүүргийн прокурорын газар, дүүргийн Хөдөлмөрийн хэлтэс хамтран зохион байгуулах арга хэмжээний хөтөлбөр гарган баталж,  уг хөтөлбөрийн дагуу Хөдөлмөрийн хэлтсийн мэргэжилтэн Д.Одмандах, Д.Туяа нар хорих ангиас суллагдсан хүмүүс болон хорих ял нь тэнсэгдсэн ялтнуудыг идэвхитэй ажил хайгчаар бүртгэн бүртгэлд хамруулан, Дүүргийн хэмжээний болон бусад аймаг нийслэлийн Хөдөлмөрийн хэлтэс, Хөдөлмөрийн төв бирж, хувийн зуучлалын байгууллагаас ирүүлсэн ажлын байрны зарыг танилцуулан, дээрх иргэдийн санал хүсэлтийг сонсон холбогдох арга хэмжээ авчээ.

 Нийгмийн даатгалын хэлтсийн сайн дурын даатгалын байцаагч Г.Батцэнгэл ажилд орох, ажилгүйдлийн тэтгэмж авах талаар болон сайн дурын даатгал, эрүүл мэндийн даатгалын талаар даатгалын байгууллагаас үзүүлж байгаа тусламж дэмжлэг, тэдгээрийг авахад зайлшгүй шаардагдах нөхцлүүдийн талаар мэдээлэл өгсөн байна.

  Хөтөлбөрийн дагуу хорих ангиас суллагдсан иргэдийг бүртгэж мэдээлэл авах, ажил мэргэжлийн чиг баримжаа олгох үйлчилгээ үзүүлэх,  хөдөлмөрийн зах зээлийн мэдээлэл хүргэх,  /мэргэжил эзэмших сургалтанд хамрагдах талаархи зөвөлгөө, ажилгүйдлийн тэтгэмж, хөдөлмөрийн зах зээлийн мэдээллийн санд ажил хайгчаар бүртгэх, ажил олгогчийг дэмжих арга хэмжээний талаар танилцуулга явуулж ажилд зуучлах үйлчилгээ үзүүлэн гарын авлага материалаар хангах зэрэг ажлыг зохион байгуулжээ.

 2. Дүүргийн прокурорын газраас уг арга хэмжээг зохион байгуулах явцад хорих ангиас суллагдах хугацаа дөхсөн, хорих ангиас тэнсэн суллагдах нөхцөл хангасан ялтанд дээрх арга хэмжээг зохион байгуулах нь Улсын ерөнхий прокурорын газраас ирүүлсэн чиглэлд нийцэж байх тул  ялтныг хорих ангиас суллагдахаас өмнө  ажлын байраар хангах зуучлах ажлыг эхлүүлэхэд хорих ангийн албан тушаалтныг мэдээллээр хангах шаардлагатай гэж үзэн,  тухайн хорих ангийн ажилтнуудаас ялтныг  суллагдсаны дараах нийгмийн асуудал буюу нийгэмд хүлээн авах орчин, ажиллах болон амьдрах байр бий болгох, хорих анги, албаны зүгээс болон хорих ангиар дамжуулан бусад төрийн болон төрийн бус байгууллагын дэмжлэг туслалцаа авах боломжтой талаар Хөдөлмөрийн хэлтсийн мэргэжилтнээр Хөдөлмөр эрхлэлтийг дэмжих тухай хууль ажил олгогчийг дэмжих арга хэмжээний талаарх сургалтыг Хорих 427 дугаар ангийн албан тушаалтан болон ялтнуудын дунд гэсэн 2 хэлбэрээр мэргэжлийн байгууллагатай хамтран зохион байгуулснаараа ач холбогдолтой арга хэмжээ болж  ялтныг нийгмийн амьдралын мэдээллээр хангасан арга хэмжээ болсон байна.

 Мөн хорих ангиудад ял эдэлж буй ялтнуудад суллагдсаны дараа хэрхэн ажлын байртай болох талаар дүүргийн Хөдөлмөрийн хэлтсээс зөвлөмж гаргуулан хүргэсний зэрэгцээ хөдөлмөрийн хэлтэстэй хамтран харьяа хорих 427 дугаар ангид газар дээр нь очиж сургалтыг 2014 оны 09 дүгээр сарын 19-ний өдөр  зохион байгуулжээ.

 Дүүргийн прокурорын газраас зохион байгуулсан ажлын  талаар мэдээлэл бэлтгэж, дүүргийн “Багануурын амьдрал” сонинд нийтлүүлж олон нийтэд хүргэж, Дүүргийн гэмт хэргээс урьдчилан сэргийлэх зөвлөлд танилцуулга хүргэж ажиллажээ.