Баянзүрх дүүргийн цагдаагийн 2-р хэлтсээс гэмт хэргийн шалтгаан нөхцлийг арилгуулах, урьдчилан сэргийлэх чиглэлээр хэсгийн байцаагч, хэрэг бүртгэгч, мөрдөн байцаагч нараас төрийн болон төрийн бус байгууллага, аж ахуйн нэгжүүдэд албан мэдэгдэл хүргүүлж, мэдэгдлийн мөрөөр "Албан мэдэгдэл-хяналт, шалгалт" нэгдсэн үйл ажиллагааг зохион байгуулж, шалгалт явууллаа.
Энэ үйл ажиллагааны хүрээнд барилгын компаниудад хөдөлмөрийн аюулгүй байдлыг хангаж ажиллах чиглэлээр зөрчил дутагдлаа арилгах талаар албан мэдэгдэл хүргүүлсэн байна. Албан байгууллага аж ахуй нэгжүүд албан мэдэгдлийн хариу бичигт бүх зөрчил дутагдлаа арилгасан гэж цагаан цаасан дээр хараар бичсэн боловч цагдаагийн алба хаагч нар газар дээр нь очиж үзлэг шалгалт явуулахад хэд хэдэн ноцтой зөрчлүүд илэрлээ.
Үүнд хөдөлмөрийн аюулгүй байдлын зааварчилгааны дэвтэр байхгүй, байгаа дэвтэр дээрээ хөтлөлт хийгдээгүй, зориулалтын малгай өмсөөгүй, хамгаалалтын тор татаагүй, мэргэжлийн инженер хүрэлцээгүй, удирдлагаар хангаж ажиллаагүй зэрэг барилгын ажил явуулахад зайлшгүй шаардлагатай хэд хэдэн нөхцлийг зөрчин ажиллаж байсан нь тогтоогдлоо.
Энэ нь эргээд хүний амь нас эрсдэх гол шалтгаан болдог тухай олон сургамж авмаар хэргүүд гарсаар байхад ийнхүү дутагдлаа давтаад байгаа нь барилгын компаны удирдлага зохион байгуулалттай шууд холбоотой юм.