Үр тариа газар тариалан эрхлэгчдийн холбоонынхон мэдээлэл хийж, үндэсний үйлдвэрлэгчдийг гацаанд оруулаад байгаа шударга бус үйлдлийн талаар илчиллээ. Тодруулбал, “Таван богд” группийн Ц.Баатарсайхан импортын будаа оруулж  ирж байгаад Үр тариа газар тариалан эрхлэгчид шүүмжлэлтэй байна. Тэрбээр ОХУ-аас 50 мянган тонн улаан буудай оруулж ирчихээд Засгийн газарт шахахаар зэхэж байсан гэдгийг ч тэд онцоллоо. Энэ нь манай улсын нэг жилийн хэрэглээний нэлээдгүй хувийг хангана гэсэн үг. 
      Тэдний мэдээлж байгаагаар  Ц.Баатарсайхан нь ҮХААЯ-ны Төрийн нарийн бичгийн дарга Х.Золжаргалтай хамтарч бизнес хийхээр долоон воган буудай оруулж ирсэн аж. Тодруулж хэлбэл, Ц.Баатарсайхан будаагаа гаднаас худалдаж авчраад, ҮХААЯ-ны Төрийн нарийн бичгийн дарга Х.Золжаргал улсын сан хөмрөгт шахах байжээ. Ингэснээр үндэсний тариалагчдын гурван улирал дараалан хөлс хүчээ урсгаж тариалсан будааны үнэ шалан дээр унах аж. Улмаар энэ төр дамнасан бизнесийг зогсоохгүй бол дараа дараагийн импортын будаа орж ирснээр дотоодын будаа ямар ч үнэгүйдэх аюултай гэдгийг ч хэллээ.