Нийслэлийн иргэдийн эрүүл аюулгүй орчинд амьдрах нөхцлийг бүрдүүлэх үүднээс төвийн зургаан дүүрэгт 16 түр уулзах цэг байгуулж эхэллээ. Түр уулзах цэг нь иргэдэд төрийн үйлчилгээг ойртуулах үндсэн зорилготой. Өөрөөр хэлбэр гэр хорооллын айл өрхүүдийн хашааны хаягжилт тодорхойгүй, мухар гудамжтай байдгаас түргэн тусламж, гал команд, цагдаа, онцгой байдлын албаныхан иргэдэд   төрийн үйлчилгээг цаг алдалгүй хүргэхэд хүндрэл үүсдэг.  Тиймээс энэхүү хүндрэлийг шийдэх үүднээс БЗД 27-р хороо Дарь эхийн хуучин эцэс эмийн сангийн хажууд, БГД 9-р хороо Далангийн ард, СХД 27-р хороо хорооны барилгын баруун урд талын замын хажууд, СБД  14-р хороо Дунд голын далан орчим, ЧД 16-р хороо Чингэлтэйн хуучин эцсийн харалдаа,ХУД  Шувуун фабрикийн эцсийн буудал, Номын сангийн баруун хойд талд, ЧД 17-р хороо Зүрх уул явах замд, СБД  14-р хороо Тоосгоны үйлдвэрийн зүүн талд, БЗД 21-р хороо Ганц худаг явах замд, БЗД 10-р хороо Амгалан дулааны станцын зүүн талд, ХУД 16-р хороо автобусны эцсийн буудлын хойд талд, ХУД 12-р хороо Сонгинын амралтын замд, СХД 9-р хороо эцсийн буудлын хажууд, СХД  3-р хороо Толгойтын гэр хороололд, СХД 7-р хороо Баянхошууны уулын урд талд, БГД 16-р хороонд нийт 16 байршилд түр уулзах цэг байгуулж байна. Түр уулзах цэгийг 219-ийн турбагаар хийсэн,12 м өндөр, 36м2 өргөнтэй, газраас доош 2 метрийн гүнд чагтан хэлбэртэйгээр хийсэн  суурьтай, 3 гэрэлтүүлэг, 3 талт түр уулзах цэгийн  дугаар, мэдээллийн  самбартайгаар баригдаж байгаа. Самбар нь 3 талтай 150*110 см хэмжээтэй хорооны газрын зураглал иргэдэд нэн шаардлагатай утасны дугаар, вэб сайтуудыг багтаасан мэдээлэлтэй байхаас гадна  хогийн сав, сандал байрлуулж мод тарих юм. Шуурхай албаныхан хаягжилт тодорхойгүй байгаа айл өрхийн иргэдтэй энэхүү цэгт уулзан үйлчилгээгээ цаг алдалгүй хүргэнэ. Иргэд ч энэ цэгээс хэрэгтэй мэдээллээ авах боломжтой юм гэж Улаанбаатар хотын Захирагчийн ажлын албанаас мэдээллээ.