Хотын захирагч түүхэндээ анх удаа Нийслэлийн цагдаагийн газрын даргыг олон нийтийн санал асуулгаар сонгох захирамжийг гаргалаа. Э.Бат-Үүл даргыг уг санаачилгыг олон нийт маш таатай хүлээн авч байна. Тэгэхээр хотын иргэд бид уг сонгон шалгаруулалтад идэвхтэй оролцох ёстой юм. Энэ нь бидний өөрсдийнхөө төлөө хариуцлагатайгаар хэрэгжүүлэх үүрэг юм. Нөгөөтэйгүүр Цагдаагийн газрын үйл ажиллагаанд иргэдийн оролцоо, хяналтыг нэмэгдүүлэх чухал ажил билээ.

Цагдаагийн даргыг сонгох сонгон шалгаруулалтад оролцохоор зургаан хүн материалаа ирүүлснээс хоёр нэр дэвшигч шалгарчээ.

Тэднийг
•    Ч.Болдбаатар
•    Д. Цэрэндорж гэдэг.

Дээрх хоёр нэр дэвшигч эрүүл аюулгүй Улаанбаатарын төлөө хэрхэн ажиллах талаар өөрсдийн мөрийн хөтөлбөрийг боловсруулсан байна.  Энэ нь ч мөн шинэ үзэгдэл. Өмнө нь цагдаагийн даргыг сонгохдоо цагдаа дотроосоо хэн нэгнийг томилдог байсан бол одоо иргэдээр сонгуулж байна. Ингэхдээ Цагдаагийн даргад нэр дэвшигчид нь өөрсдийн мөрийн хөтөлбөрөөр өрсөлдөж байгаа юм. Тодруулбал, хэн иргэдийн амьдралд хэрэгтэй, бидний аюулгүй байдлын төлөө ажиллаж чадах мөрийн хөтөлбөр боловсруулсан байна тэр Нийслэлийн Цагдаагийн даргаар сонгогдоно гэсэн үг.

Санал авах ажиллагааг шударга байлгах зорилгоор мөрийн хөтөлбөрийг танилцуулахдаа нэр дэвшигчдийн нэрийг нууцалж, А, Б гэсэн тэмдэгтээр тэмдэглэжээ. Харин сонгон шалгаруулалтын нэг үнэлгээ болох нэр дэвшигчдийн шууд халз ярилцлага, мэтгэлцээнийг  энэ сарын 05-ны өдөр /ням гарагт/ UBS телевизээр 21.00 цагт явуулах юм байна.

Харин иргэд та бүхэн энэ сарын 8-ны өдрийн дуустал  Нийслэлийн албан ёсны вэб сайт болох www.ulaanbaatar.mn сайтаар саналаа өгөх эрхтэй аж.

Тэдний мөрийн хөтөлбөртэй танилцвал анхаарал татах юм их байна. Тухайлбал нэр дэвшигч А нь “Хөршийн хамгаалалтын хөтөлбөр”-ийг хэрэгжүүлнэ гэжээ. Энэ нь хөршүүд нэгнийгээ эзгүй хойгуур гэр орныг нь эргэх, аль нэгэнд нь тусламж хэрэгтэй бол туслах гэх мэт утгатай аж. Үүнийг иргэд ихээхэн дэмжиж байна. Мөн нэр дэвшигч А “Сум, хорооны цагдаа нар иргэдээс улирал тутам бичгээр санал авдаг болох заалтыг мөрийн хөтөлбөртөө тусгажээ. Үүнийг ч мөн хүмүүс их дэмжиж байна.

Харин нэр дэвшигч Б нь “Би тусалж чадахгүй. Надад хамаагүй” гэдэг үгийг цагдаа нараар хэлүүлэхгүй болгоно гэжээ.  Мөн тэрээр иргэдийн орон сууц, машин зэргийг шийдэж өгнө гэсэн нь эд, материал амалж санал авах гэсэн оролдлого гэж үзэх хүмүүс байна.

Энэ мэт тэдний мөрийн хөтөлбөрт сонирхолтой, хэрэгтэй саналууд ихээр багтжээ. Ямартай ч хоёр нэр дэвшигч мөрийн хөтөлбөр гаргаад түүнийгээ ард түмнээр хэлэлцүүлж буй нь маш том шинэчлэл. Харин бид шинэчлэлд гар бие оролцож саналаа өгөх хэрэгтэй. Мөрийн хөтөлбөртэй нь холбогдуулаад санал бодлоо хэлэх хэрэгтэй билээ.

Та бүхэн тэдний мөрийн хөтөлбөртэй танилцахыг хүсвэл энд дарна уу.