Энэ сарын 24-27-ны хооронд Тайвань улсын Тайпей хотноо Ази тивийн 20 гаруй улсын төлөөлөл нэгдэж, цөмийн аюулын эсрэг чууллаа. Тус хуралд Монголоос “ДМНН”, “Босоо Хөх Монгол”, “Цөмийн аюулгүй Монгол Улсын төлөө” ТББ-ын төлөөлөл оролцлоо.  Дээрх  ТББ-ууд нь сүүлийн жилүүдэд цацраг идэвхт ашигт малтмал буюу ураны олборлолтыг эсэргүүцэж, энэ чиглэлээр тууштай, тасралтгүй ажиллаж байгаа юм.

Манай төлөөлөгчид “Цөмийн аюулгүй Ази” чуулга уулзалтад Монгол Улс дахь цацраг идэвхт ашигт малтмалын хайгуул, олборлолт болон энэ чиглэлээр үйл ажиллагаа явуулж буй орон нутгийн байгаль орчин, мал амьтанд ямар өөрчлөлт гарсан талаар танилцуулсан юм. Мөн Монгол улсад ураныг хайх, туршилтаар олборлох төдийд л гарч эхэлсэн байгаль орчны эсрэг сөрөг нөлөөллүүдийг таслан зогсоох зорилгоор хэрхэн тэмцсэн болохоо танилцууллаа.
Хуралд оролцсон төлөөлөгчид өөрсдийн бэлтгэсэн илтгэлүүдээ танилцуулж ураны хайгуул, олборлолт, ашиглалт зэрэг нь бүхий л үе шатанд аюул байдаг, тиймээс хамтаараа нэгдэн нийлж, энэхүү аюулыг таслан зогсоох шаардлагатай үзсэн юм.

Тухайлбал, Тайвань улсын Тайпей хотод баригдаж байгаа цөмийн 4-р реакторт очиж, ураны эсрэг тэмцэгчид эсэргүүцлээ илэрхийлсэн юм. Үүгээр ч зогсохгүй, цөмийн 4-р реакторыг цаашид барихгүй байхыг шаардаж, үйл ажиллагааг нь зогсоосон.

Тайпей хотод цөмийн  гурван реактор байдаг бөгөөд тус хотын иргэд эдгээр реакторуудын аюулгүй байдалд ихээхэн санаа зовниж явдгаа илэрхийлэв. Учир нь ямар ч аюулгүй, баталгаатай гэгдэж байсан Японы Фүкүшима цөмийн цахилгаан станцын  реакторт дэлбэрэлт болж, дэлхий дахиныг цочроосон. Өдгөө дэлбэрэлт болсон реактороос 20 км-ийн радиуст хөл хорио тогтоосон бөгөөд цөмийн цацраг агуулсан тоосонцор нь АНУ-ын баруун эрэгт хүрсэн байна. Тиймээс  Тайпей хотынхон төдийгүй Ази тивийнхэн цөмийн реакторуудын аюулгүй байдалд эргэлзэж, сэтгэл түгшсэн байдалтай байгаа юм.
“Цөмийн аюулгүй Ази чуулга” уулзалтанд Тайвань улсын дэд ерөнхийлөгч асан Лү Сюү Лиен Анетте оролцсон бөгөөд чуулганд оролцогчид цаашид цөмийн цахилгаан станцаас татгалзаж, сэргээгдэх эрчим хүчийг хөгжүүлэх шаардлагатай гэж үзсэн юм. Мөн 2015 онд Монгол Улсад, Ази болон Европ тивийнхэн хамтарч чуулга уулзалт зохион байгуулж, ураны хайгуулын шатнаас ашиглах бүхий л үе шат, цаашлаад цөмийн хэрэглээг эсэрүүцэж тэмцэхээр боллоо.