Архинаас л боллоо...гээд олон хүмүүс халаглаж харамсах болж. Харамсалтай нь хашрахгүй ахиад л архи ууж, элдэв гэмт хэрэг үйлдэж, хормын дотор л хорвоогийн амьдрал нь эргэчих нь.
Хайран амьдрал. Архи ямар ярих биш. Намайг архи гэдэг, та намайг уугаач гээд өвдөг сөгдөн гуйж ярьсан юм шиг л энэ муу архинаас л боллоо....гээд архийг л буруутгаад байхаас ухаанаа буруутгах хүн тун цөөхөн юм.
Гэмт хэрэг үйлдэх болсон гол нөхцөл шалтгааны дийлэнх хувийг архидалт эзлэдэг. Улсын хэмжээнд 2013 оны байдлаар согтууруулуулах ундаа худалдах тусгай зөвшөөрөл бүхий 2880 аж ахуй нэгж үйл ажиллагаа явуулж, 9703 цэгт зарж борлуулж байна гэсэн тоо баримт байна. Хүртээмж нь нэмэгдээд байхаар үүнийгээ дагаад хор хөнөөл нь улам нэмэгддэг. Манай улсад сүүлийн 15 жилд архинд донтох өвчний эзлэх хувийн жин 2.7 дахин өссөн бөгөөд Хордлогын яаралтай тусламжийн үндэсний төвийн албан ёсны мэдээ баримтаас vзэхэд 2006-2011 оны үед жил бүр архины цочмог хордлого бүхий 180-200 өвчтөн ирж тусламж авч байгаагийн зургаан хувь нь нас барсан байна гэх тоо баримт бий. Гэхдээ өнгөрсөн жилүүдээс энэ тоо хэдэн хувиар ч өссөн байж болох юм.
Согтууруулах ундааны хяналтын тухай хууль батлагдчихвал ч бүх юм сайхан болох юм шиг бодох хүмүүс олон ч хөдөө бол энэ зөвшөөрөл ч хэрэгжихгүй тохиолдол цөөнгүй.
Төв аймгийн цагдаагийн газраас хяналт шалгалтын хүрээнд нэгдсэн арга хэмжээ зохион байгуулахад орон нутагт архи согтууруулах ундаа худалдаж борлуулах зөвшөөрөлгүй аж ахуй нэгж байгууллагууд 24 цагаар үйлчилгээ явуулж байхыг илрүүллээ.
"Хууль" хөдөө хамаагүй гэж тооцоолжээ. Аргалант сумын нутаг дэвсгэрт зам дагуу хоолны газар ажиллуулдаг аж ахуй нэгж байгууллагууд энэ төрлийн зөрчил дутагдал гаргасан байна. Орон нутгийн замд гарах осол аваар буурахгүй байгаа энэ үед хөдөө үйл ажиллагаа явуулдаг дэлгүүрүүд 24 цагаар шахам архи борлуулж, тэр дундаа зөвшөөрөлгүй үйл ажиллагаа явуулж байгаа нь хүний амь нас эрсдэхээс эхлээд олон хор уршиг дагуулна гэдгийг мэдэхгүй байн уу, эсвэл мэдсээр байж хууль зөрчөөд байна уу?
Цаашлаад ашиг хонжоо харж нийгэмд хор хөнөөл, амьдралд гай авчрах архийг цаг харгалзалгүй зарж байгаа дэлгүүрүүдийн эзэд, худалдагчдад сэтгэл гэж байна уу ч гэж асуумаар. Гэвч нийгэмд яалтачгүй энэ нь хэрэгцээ болсоор байгаа болохоор наймаачид ашиг орлогоо бодохгүй байна гэдэг ч хэцүү.
Гагцхүү архи гээч зүйлийг шунаж уух хүсэлтэй, архийг яг л энгийн өдрүүдийн хэрэглээ мэт, эсвэл хүнсний нэмэлт хэрэглээ мэт хэрэглэсээр байгаа хүмүүс эцэст нь юу алдаж болохоо ойлгоосой. Архинаас болж л гэмт хэргийн гаралт ихсэж, архинаас болж л хүүхэд өнчирж, архинаас болж л эхнэрүүд бэлэвсэрч, архинаас болж л хүмүүс алтан амиа алдах нь ихсэж байна шүү дээ.
Төр засгаас ч үүнд түлхий анхаарч архины үйлдвэрлэл, зөвшөөрөлтэй цэгүүдийг хязгаарлах хэрэгтэй байгааг анхаарах цаг болжээ.
24tsag.mn
Сэтгэгдэл (3)