Сүүлийн үед хэд хэдэн барилгын осол гарч маш олон хүний амь нас эрсэдсэн харамсалтай хэрэг гарсан. Харин осол гарсаны дараа Мэргэжлийн хяналтын байгууллагаас тухайн барилгуудыг зөрчилтэй байсан, үйл ажиллагаа явуулах эрхгүй байсан мэтээр тайлбарладаг. Энэ бүхнээс болж мэргэжлийн хяналтын байгууллага ажлаа хийж чадахгүй байна гэх шүүмжлэл ихээр гарч эхэлсэн. Цаашлаад Мэргэжлийн хяналтын газрыг татан буулгая гэх яриа ч хүчээ авч байгаа.

Гэтэл Мэргэжлийн хяналтаас ниргэсэн хойно нь хашгирна гэгчээр өөрсдийг нь хүчтэй шүүмжлээд, эхлэнгүүт нөгөө л хуучин арга барилаараа гэнэт хяналт шалгалтаа идэвхжүүлж, энд тэндээс баахан зөрчил дутагдал илрүүлж эхлэв.

Гэхдээ сурсан дассанаараа нөгөө л хүнсний зах руу ороод Хятадаас гарал үүсэл нь тодорхойгүй хүнс орж ирж байна гээд л хэдэн наймаачдыг бөнжигнүүлээд эхлэв. Чингэлгүүдийг хаав.

Бүр сүүлдээ Гандантэгчин рүү орж гандангийн тагтаа нарт будаа өгөхийг хориглож, будаа зарж хоногийн хоолоо олж байгаа ядарсан хөгшчүүдийг боомилж эхлэв. Өөрөөр хэлбэл, тэд будаа зардаг хөгшчүүдийг үүрэгдэж, худалдаа хийхийг хориглов.

Энэ мэт мэргэжлийн хяналтынхныг хүнсний дэлгүүр, мухлаг, захууд, гар дээрээс наймаа хийгчдийг хянаж шалгаадах гэж томилсон аятай аашилсаар байгааг иргэд шүүмжилж байна.

Мэргэжлийн хяналтынхан арга барилаа өөрчлөх, хууль эрхзүйг шинэчлэх цаг болсон аятай уг нь. Учир нь тэдний ажилдаа хянуур хандаагүйгээс, барилгын компаниудыг өөхшүүлснээс олон сайхан залуус амиа алдлаа шүү дээ.

Гэтэл тэд барилгын компаниудын эздийг, барилгын компаниудыг яаж ч чадахгүй байгаа хэрнээ ядарсан хэдэн наймаачдыг хэдий болтол ингэж дарамтлах юм бэ?. Бид ядарсан наймаачид гэхээрээ хууль зөрчиж болно гэсэн утгаараа энэ нийтлэлийг бичсэнгүй. Гагцхүү Мэргэжлийн хяналтын байгууллагынхан албан байгууллагуудад, баячуудад ижил тэгш үйлчлэх хэрэгтэй байна.

Мөнгөтэй, баян, эрх мэдэлтэй нэгэнд нь сануулга өгөөд өнгөрч байх хооронд хууль бус үйл ажиллагаа, хүний амь эрсэдсэн явдал гарсаар байна. 

Уг нь  Мэргэжлийн хяналтын байгууллага ажилдаа алдаа дутагдал гаргаж байгаа бол тэрийгээ шүүж тунгааж, ажлаа хэрхэн боловсронгуй болгож, арга барилаа өөрчлөх, хууль эрхзүйг шинэчлэх зүйл бодмоор юм.

Дашрамд хэлэхэд, Зах зээлийн ороо бусгаа үед аж ахуйд дагаж мөрдөх стандарт дүрэм журам гэгч нь ч нойл байхтай мэргэжлийн хяналтын мандан бадрал давхцсан. Зөрчилгүй байгууллага, ягштал хэвшсэн стандарт гэж байсангүй. Улсын байцаагчийн улаан үнэмлэхтэй эрхмүүд зөрчил гологдлийг улс орон даяар илрүүлж одоо л бүх зүйл журмандаа орох нуу гэмээр давалгаа явсан. Хоолонд хүн хордсон, барилга эвдэж сүүдсэн гээд юм болгон дээр мэргэжлийн хяналтын байгууллага акт тавьж хариуцлага ярина. Ард иргэд болон төр засагтаа хандаж “эднийг хянахад бидний эрх мэдэл багадаад байна” гэсэн мэдэгдлийг хийдэг. "Нээрээ ч эрх мэдэл нь багадаад байна даа" гэсээр хамаг тусгай зөвшөөрөл олгох, торгох эрхийг нэг нэгээр нь бусдаас салгаж мэргэжлийн хяналтын ерөнхий газар дээр төвлөрүүлсээр ирсэн.Ингээд сайжирдаг бол сайжирхаар л хугацаа өнгөрлөө. Гэтэл асуудал улам овоороод, авлига хүнд суртал нь дийлдэхээ болиод, аж ахуйг дарангуйлагч анги болон хувирч байна. Хэрэг зөрчлийн дараа хэрэг зөрчил үйлдэгчийг гэсгээх эрх тухай ярьдаг болохоос хяналтын механизмыг яаж оновчтой үр дүнтэй болгох талаар ярьдаггүй. Хоосон эрх мэдэл хүнд суртал л овоолоод байдаг. Үүнээс л хяналтын тогтолцооны дампуурал эхэлсэн юм.

Ийн асуудал мэргэжлийн хяналтын эрх мэдэл багадсандаа, тусгай зөвшөөрөл цөөдсөндөө биш хүч бололцоо хүрэхгүй байгаадаа ч биш. Ерөөсөө л механизм ажиллахгүй болсон доо шүү дээ.