Монгол Улсын Шадар сайд Д.Тэрбишдагва 2014 оны 10 дугаар сарын 01-ний өдөр тушаал гарган Юнгэрэнгийн Галсанг Мэргэжлийн хяналтын ерөнхий газрын дэд даргаар томиллоо.  Ю.Галсан 2010 оноос хойш тус газрын Хүнс, хөдөө аж ахуй, үйлдвэр, үйлчилгээний хяналтын газрын даргаар ажиллаж байсан юм. Шадар сайдын тушаалыг сонсгосноор Мэргэжлийн хяналтын ерөнхий газраас аймаг, нийслэлийн хяналтын байгууллагатай цахимаар холбогдож өнгөрсөн 14 хоногт хийсэн ажлаа хэлэлцэн, ирэх 14 хоногт хийх ажлаа тодотгодог ээлжит хурал эхэллээ.

Өнгөрсөн 14 хоногт Увс, Дундговь, Дорнод, Баян-Өлгий аймагт “Ард түмэн Та-Хаан” форумыг “Эрүүл, аюулгүй орчин”, “Шилэн тендер” зэрэг сэдвээр зохион байгуулж, иргэдийн санал хүсэлтийг сонсон, боломжтойг нь газар дээр нь шийдвэрлэжээ. Мөн тухайн сэдвээр үзүүлэх сургууль хийн иргэдэд мэдлэг, мэдээлэл өгсөн байна.

Нэр бүхий аймгууд “Үдийн цай” хөтөлбөрт хяналт шалгалт хийж дүнгээ нэгтгэж байна. Завхан аймагт гэхэд л шаардлага хангахгүй, мэргэжлийн бус тогооч ажиллуулж байсан зөрчлийг илрүүлж, тогооч нарыг сургалтад хамруулж эхэлжээ.

Системийн хэмжээнд төлөвлөгөөт болон төлөвлөгөөт бус хяналт шалгалт, танадалт судалгааны жилийн ажлын төлөвлөгөө 70-95 хувьтай байна. Үлдэж байгаа хугацаанд төлөвлөгөөгөө шахаж ажиллахыг МХЕГ-ын дарга Д.Батмөнх аймаг, нийслэлийн Мэргэжлийн хяналтын газрын дарга нарт үүрэг болголоо.

Газар тариалангийн бүс нутаг болох Дархан-Уул, Булган, Сэлэнгэ зэрэг аймаг дахь ургац хураалтын явц, үрийн улаан буудайд хяналт тавьж байна. Өнгөрсөн хугацаанд аймаг, нийслэлийн Мэргэжлийн хяналтын газрууд үйлдвэрлэлийн осол, хоолны хордлого, малын гоц халдварт өвчнөөс урьдчилан сэргийлэх ажлаа эрчимжүүлжээ.

Ирэх 14 хоногт дараах чиглэлээр ажиллахыг Мэргэжлийн хяналтын ерөнхий газрын дарга Д.Батмөнх үүрэг, чиглэл болгов.

Энэ дагуу аймаг, нийслэлийн Мэргэжлийн хяналтын газрууд:

    Барилга дээр гарч байгаа үйлдвэрлэлийн ослыг бууруулах чиглэлээр орон нутгийн төрийн болон төрийн бус байгууллагуудтай хамтын ажиллагаагаа идэвхжүүлэх
    Хоолны хордлого гарсан үед нарийвчилсан зааврын дагуу ажиллаж, мэдээ, мэдээллээ шуурхай өгч байх
    Төв, орон нутгийн Мэргэжлийн хяналтын газрууд хяналт шалгалтын объектод эрсдэлийн үнэлгээг зөвлөмжийн дагуу хийж хурлаараа хэлэлцэх
    Хилийн мэргэжлийн хяналт шалгалтаас чөлөөлсөн 3550 нэр төрлийн бараа, бүтээгдэхүүний жагсаалтыг хэвлэл мэдээллийн хэрэгслээр дамжуулан нийтэд хүргэх
    Хил дээр эрсдэлд суурилсан хяналт шалгалтыг нэвтрүүлэх талаар батлагдсан эрх зүйн актуудын хэрэгжилтийг хангах
    Замын-Үүд боомтод хилээр нэвтэрч байгаа бараа, бүтээгдэхүүн тээвэрлэсэн тээврийн хэрэгсэлд тээврийн хяналтын улсын байцаагч нэг бүрчлэн хяналт шалгалт хийж байгааг зогсоох, тээврийн хяналтын хяналтын улсын байцаагч ажиллах шаардлагатай эсэхийг нэг мөр шийдвэрлэх
    Гадаад худалдааг хөнгөвчлөх чиглэлээр гарсан эрх зүйн шинэтгэлийн бодлогыг хэрэгжүүлэхэд онцгой анхаарах
    Хил, гүний хяналтын улсын байцаагчдын ёс зүй, сахилга хариуцлагыг сайжруулах аян зохион байгуулах зэрэг ажил хийх боллоо.