Монгол Улсын Ерөнхий прокурор,Төрийн Хууль Цаазын Тэргүүн зөвлөх Д.Дорлигжав 2014 оны 10-р сарын 08, 10-ны өдрүүдэд Бүгд Найрамдах Узбекстан Улсын нийслэл Ташкент хотноо болсон Шанхайн хамтын ажиллагааны орнуудын Ерөнхий прокуроруудын 12 дахь уулзалтанд БНУзбекстан Улсын  Ерөнхий прокурор Рашитжан Кадировын урилгаар оролцоод ирлээ.

Тус арга хэмжээнд Шанхайн хамтын ажиллагааны орнуудын Ерөнхий нарийн бичгийн дарга Мезенцев Дмитрий Фёдорович болон гишүүн  орон болох Казакстан, Хятад, Киргиз, ОХУ,  Таджикстан, Узбекистан улсын Ерөнхий прокурорууд оролцож,

    Шанхайн хамтын ажиллагааны байгууллагын гишүүн орнуудын “Байгаль орчин хамгаалах хуулийн төслийг хэрэгжүүлэх ажиллагаанд тавих хяналт”
    Шанхайн хамтын ажиллагааны байгууллагын гишүүн орнуудын “Бизнес, аж ахуйн байгууллагын эрхийг хамгаалах хууль тогтоомжийн хэрэгжилтэнд  тавих хяналт”
    Шанхайн хамтын ажиллагааны гишүүн орнуудын ”Насанд хүрээгүй хүүхдийн эрх ашгийг хамгаалах хүрээнд хэрэгжүүлж байгаа прокурорын хяналт”
    “ Гэмт хэрэг үйлдэж олсон эд хөрөнгийг хураах, буцаан олгох” талаархи Шанхайн хамтын ажиллагааны байгууллагын гишүүн орнуудын хууль тогтоомж, практик ажиллагааны тухай асуудлыг хэлэлцжээ.

Уулзалтанд Энэтхэг, Иран, Монгол Улс   ажиглагчаар оролцсон байна.

Энэхүү арга хэмжээний үеэр Монгол Улсын Ерөнхий прокурорын газар, Бүгд Найрамдах Узбекистан Улсын Ерөнхий прокурорын газрын хооронд хамтран ажиллах тухай санамж бичигт гарын үсэг зурсан нь хоёр орны прокурорын байгууллагын хамтын ажиллагааг хөгжүүлэхэд чухал алхам боллоо.

Түүнчлэн Монгол Улсын Ерөнхий прокурор Д.Дорлигжав БНХАУлсын Ардын дээд Прокурор  Цао Цзяньмитай уулзаж 2 орны прокуроруудын хамтарсан сургалт явуулах, Эрх зүйн туслалцаа харилцан үзүүлэх гэрээг хэрэгжүүлэх механизмийг боловсронгуй болгох,  хил орчмын прокуроруудын хамтын ажиллагааг эрчимжүүлэх зэрэг асуудлуудаар ярилцжээ.

Монгол Улсын Ерөнхий прокурорыг дагалдан Улсын Ерөнхий Прокурорын туслах, Гүйцэтгэх ажилд тавих хяналт хариуцсан хэлтсийн дарга О.Чулуунбаатар, Улсын ерөнхий прокурорын газрын Эрх зүйн туслалцаа, Гадаад харилцаа хариуцсан хяналтын прокурор Г.Ганзориг нар явсан байна.

Хуралдааны төгсгөлд дараагийн уулзалтыг 2015 онд Бүгд Найрамдах Казакстан улсад хийхээр ярилцаж тохиролцжээ.