Төрийн байгуулалтын байнгын хороо яг одоо Төрийн ордонд хуралдаж байна. Тус хуралдаанаар Засгийн газрын бүрэлдэхүүнд өөрчлөлт оруулах асуудлыг хэлэлцэж байгаа юм. Цаашилбал шинээр томилогдох сайд нарын асуудлыг ярьж байна. Тодруулбал, Ерөнхий сайд Н.Алтанхуяг 7 сайдыг чөлөөлж, дөрвөн сайдыг томилох асуудлыг уг хуралдаанд оруулж ирэв. Төрийн байгуулалтын байнгын хорооны зарим гишүүд бүх сайд нарыг хуралд орж ирэхийг энэ үеэр шаардлаа.

Сангийн яам, Эдийн засгийн хөгжлийн яамыг нэгтгэн Сангийн яам, Уул уурхайн яам, Эрчим хүчний яамыг нэгтгэн Геологи, уул уурхай, эрчим хүчний яам, Барилга хот байгуулалтын яам, Зам тээврийн яамыг нэгтгэн Дэд бүтцийн хөгжлийн яам болгон өөрчилж, нийт 13 яамтай ажиллахаар Монгол Улсын Засгийн газраас Монгол Улсын Засгийн газрын тухай хуульд нэмэлт, өөрчлөлт оруулах тухай, Засгийн газрын бүтцийн тухай хуульд өөрчлөлт оруулах тухай хуулийн төслүүдийг санаачлан боловсруулж, Улсын Их Хуралд өргөн мэдүүлсэн билээ.

Мөн нэмэгдэж Гадаад харилцаа, эдийн засгийн хамтын ажиллагааны сайд, Зам тээвэр, барилга хот байгуулалтын сайд, Уул уурхай, эрчим хүчний сайд байх өөрчлөлт оруулахыг санал болгож байгаа. Дээрх өөрчлөлтийг оруулснаар Монгол Улсын Засгийн газар нь Ерөнхий сайд, Шадар сайд болон 14 сайдын бүрэлдэхүүнтэйгээр ажиллахаар болж байгаа юм.