Дарга нарын байр ард түмний эмнэлгээс том бас чамин байна. За том чаминаа байг гэхэд дарга нарын байр маш хурдацтай баригдаж, харин эмнэлэг, сургуулиудын барилгын ажил удаашралтай байгаа нь иргэдийн ундууцлыг багагүй хүргэдэг билээ.

    Өөрөөр хэлбэл, Засаг дарга нарын тамгын газар, ЦЕГ-ын шинэ байр гээд л бүгд л маш хурдан ашиглалтанд орж, өндөр өндөр барилгууд сүндэрлэж байна. Гэтэл эмнэлэг, сургуулиудын байр одоо ч хүрэлцээгүй, бас тохь тухгүй байгаа нь эмзэглэмээр сэдвийн нэг яахын аргагүй мөн юм.

    Харин баригдахаар төлөвлөгдсөн зарим нэг сургууль, цэцэрлэгүүд байгаа ч  барилгын ажил нь эхлээд л таг чиг болчихдог. Улмаар ашиглалтанд орохгүй, барилгын ажил нь дуусахгүй олон жилийн нүүрийг үздэг бичигдээгүй хууль тогтчихсон гэлтэй.

    Гэтэл дүүргийн засаг захиргааны түшмэдүүд өндөр сайхан байшинд тухлан суудаг жишиг тогтчихсон байгаа юм.

Адаглаад энэ бүхэн дээр урд хөршөөсөө суралцах хэрэгтэй шүү дээ.  Хятадын ерөнхийлөгч Си Зиньпин 160 мянган төрийн албан хаагчаа цомхотгож байсан. Ямар ч шаардлагагүй гэж үзсэн 800 гаруй барилгын ажлыг цуцалж байсан. Энэ нь дандаа Засгийн ордон, төрийн захиргааны оффисын барилга байсан. Улмаар эдгээр барилгынхаа оронд бага сургууль, эмнэлэг барих шийдвэр гаргаж байсан.

    Харин Монголд энэ бүхэн эсрэгээрээ тогтдог. Дарга нарын, төрийн албан хаагчдын байрлах байр хурдан баригдаж, эмнэлэг, түлэнхийн төв, сургууль, цэцэрлэг удаашралтай байдаг.

    Өөрөөр хэлбэл,  төсвийн хөрөнгө оруулалтаар дарга нарын ордон, цагдаагийн байрууд хурдан баригдаж байна. Гэтэл эмнэлэг, цэцэрлэг, сургууль босохдоо удаан, балгас хэлбэртэйгээ байсаар байгаа юм.

    Баянзүрх, Хан-Уул дүүргийн засаг даргын тамгын газрын ордон гээд  бүгд л  хурдан босч байна. Гэтэл түлэнхий төв, амаржих газар, нэгдсэн эмнэлэг, цэцэрлэг сургуулиуд баригдахгүй олон жил дамналаа. Уг нь тендерт нь хугацаа заасан баймаар юм. Гэвч барилгын компаниуд ажилдаа үүрэг хариуцлагагүй хандаж, хяналт тавих ёстой төрийн түшээдүүд нь ч тоодоггүй.

    Бодит жишээн дээр авч үзэхэд, 2011 онд ҮАБЗ-өөс ямарч гамшигт өртөхгүй байх цусны төв барих шийдвэр гарсан. Гэвч 2014 он болчихоод байхад барилгын 50 хувь ч баригдаагүй байх жишээтэй. Мөн Хан-Уул дүүрэгт баригдах ёстой Гуравдугаар амаржих газар босч өгөхгүй байсаар л  байна. “Нийслэл өргөө”-гийн гүйцэтгэх ёстой уг барилга баахан будлиан үүсгээд л нам жим боллоо.