Улаанбаатар хотод тусгай хамгаалалтад авсан цөөхөн хэдэн газар бий. Үүний нэг бол Сэлбэ гол. Учир нь энэ голын сав газар нь Улаанбаатар хотын хамгийн их хүн амын төвлөрөлтэй зуслан, гэр хороолол ихтэй нутаг. Хойноос урагшаа намссан байрлалтай, уулархаг гадарга ихтэй учраас хөрсний бохирдол нь гадаргын болон газрын доорхи урсацаараа урагшаа буюу хотын төв рүү чиглэсэн байдаг. Энэ нь Сэлбэ гол бохирдохын хирээр Туул гол болон төвийн усан хангамжийн худгууд бохирдох аюултай юм.
Улмаар 2 жилийн өмнөөс Сэлбэ голоо сэргээж, тохижуулна хэмээгээд Сүхбаатар дүүргийн засаг даргын тамгын газраас нэлээн өндөр өртөгтэй төсөл хүртэл хэрэгжүүлж байсан.
Гэвч тэр нь гүүр барих асуудал болоод л тэгсхийгээд хаягдсан. Гэтэл гүүрний нэг  талаас  хаанаас  гарч байгаа нь  мэдэгдэхгүй бохир гарч ирэх боллоо. Өөрөөр хэлбэл, Сэлбэ голын хаа нэгтээгээс бохироо нийлүүлээд байгаа дүр зураг харагдах болжээ.  Энэ бохирыг хаанаас асгаад /нийлүүлээд/ байгаа нь тодорхой бус ч ямар нэг албан байгууллага, айл өрх шугам хоолой татаж бохироо нийлүүлж байгаа болов уу гэсэн хардлага бий болж байгаа юм. Тэгвэл хотын төвд урсаж байгаа төвийн усан хангамжийн худгуудтай нийлдэг уг голд бохироо асгаж байгаа нь зөв  үү?. Үүнд Байгаль орчин, ногоон хөгжлийн яам, Мэргэжлийн хяналтын байгууллагууд анхаарлаа хандуулах хэрэгтэй байна.
Хэдхэн сарын өмнө Туул голд нууц суваг татаад бохироо асгаж байсан тохиолдол хүртэл гарч байсан шүү дээ. Тиймээс цаг алдалгүй үүнийг шалгаж, ямар учиртайг тогтоохыг холбогдох байгууллагуудаас хүсч байна.