Архангай аймгийн Прокурорын газраас санаачлан аймгийн Хөдөлмөрийн хэлтэс, Цагдаагийн газартай хамтран “Зорилготой амьдаръя” өдөрлөг-сургалт боллоо. Өдөрлөг-сургалт тусгай хөтөлбөрөөр явагдав. Өдөрлөг сургалтанд Шүүхээс хорих ял оногдуулж тэнссэн, ял хойшлуулсан, хорих ял эдлэхээс хугацааны өмнө тэнсэн суллагдсан, хорих ангиас суллагдсан 36 иргэн мөн аймгийн Шүүхийн шийдвэр гүйцэтгэх албаны харъяа Цагдан хорих байрны аж ахуйн үйлчилгээнд ял эдэлж байгаа  8 ялтан, аймгийн Прокурорын газар, Хөдөлмөрийн хэлтсийн ажилтан, албан хаагчид   оролцсон байна.

“Өдөрлөг-сургалт”-ыг аймгийн Прокурорын газрын Ял эдлүүлэх ажиллагаанд тавих хяналт хариуцсан хяналтын прокурор С.Алтантуяа, Хөдөлмөрийн хэлтсийн мэргэжилтэн Т.Аззаяа нар удирдан явуулжээ.

“Өдөрлөг-сургалт”-ын гол зорилго нь: Зөвлөгөө, мэдээлэл өгөх, ажил олгогч байгууллагын захиалгын дагуу ажлын байранд зуучлах, хөдөлмөр эрхлэлтийг дэмжих төсөл хөтөлбөрт хамруулах, гэмт хэргээс урьдчилан сэргийлэх яриа, таниулга, ухуулга, сурталчилгаа явуулах, хорих ангиас суллагдаж ирсэн иргэдийг сургалт, урамшуулал, төслийн зээлд хамруулах, ажил хөдөлмөр, цалин орлоготой болгох, иргэний бичиг баримттай болгоход чиглэгдсэн байна.

“Өдөрлөг-сургалт”-ын явцад аймгийн Прокурорын газрын орлогч прокурор А.Золжаргал Прокурорын байгууллагын үйл ажиллагааны талаар, Хөдөлмөрийн хэлтсийн дарга Х.Отгонбат аймгийн Хөдөлмөрийн хэлтсийн үйл ажиллагааны талаар мэдээлэл хийж, аймгийн Багшийн дээд сургуулийн багш Б.Гэсэрмаа “өдөрлөг-сургалт”-нд оролцогч нарт “Сэтгэл зүй хувь хүний төлөвшил, нийгэмшүүлэх сургалт” хийжээ.

Аймгийн Прокурорын газар, Хөдөлмөрийн хэлтэс хамтран “ YIP ТАНХИМ” нэг цонхны үйлчилгээ зохион байгуулж, прокуророос иргэдийн санал, хүсэлтийг хүлээн авч, шийдвэрлэн, Хөдөлмөрийн хэлтсийн мэргэжилтэн нар ажил хайгч иргэдийг бүртгэн зөвлөгөө өгч хөдөлмөр эрхлэлтийн мэргэжил олгох, ур чадварын сургалтанд бүртгэж, хөдөлмөр эрхлэлтийг дэмжих төсөл хөтөлбөрт хамруулах талаар мэдээлэл, зөвлөгөө өгч, оролцогт нарт гарын авлага, материал тараан өгч ажиллажээ.

Ийнхүү “өдөрлөг-сургалт”-ыг зохион байгуулан явуулсан нь иргэд хууль эрхийн зөвлөгөө авч, ажил хөдөлмөртэй болох, цалин орлоготой байх, гэмт хэрэг, зөрчил буурахад чухал үр дүнтэй ажил болсон гэж дүгнэсэн байна.