МХЕГ-ын дарга Д.Батмөнх, дэд дарга Б.Эрдэнэбилэгт тэргүүтэй албаны хүмүүс Буянт-Ухаа боомтын хил хяналтын байгууллагуудын удирдлагуудтай уулзаж, Эбола вирусын халдвараас урьдчилан сэргийлэх, өвчлөл гарсан болон халдварын сэжиг илэрсэн үед халдвар эсэргүүцэх хариу арга хэмжээний бэлэн байдлыг хилийн нэвтрэх цэгт хэрхэн хангаж байгаа тухай болон халдвараас урьдчилан сэргийлэх, өвчлөл гарсан болон сэжиг илэрсэн үед халдвар эсэргүүцэх хариу арга хэмжээ авах бэлэн байдалтай танилцлаа.МХЕГ-ын дарга Д.Батмөнх боомт дахь хил, хяналтын байгууллагууд халдвараас урьчилан сэргийлэх, халдвар эсэргүүцэх хариу арга хэмжээний үйл ажиллагааны уялдаа холбоог улам сайжруулж ажиллах, Хилийн нэвтрэх цэгт байрлах тусгаарлах өрөөг олон улсын эрүүл мэндийн дүрмийн шаардлагын дагуу бэлэн байдалд оруулах, Агаарын хөлөгт сэжиг бүхий зорчигч илэрсэн тохиолдолд агаарын хөлгийг зогсоох ариун цэврийн тусгайн талбайн зурвасыг тогтоож, баталгаажуулах, Тусгай зориулалтын хамгаалах хувцас, хэрэгсэл зэрэг шаардлагатай зүйлсийн талаар Улсын байнгын онцгой комисст нэгдсэн байдлаар хандаж, шийдвэрлүүлэх талаар үүрэг даалгавар өгсөн юм.
Дэлхий дахинд шинэ болон дахин сэргэж байгаа халдварт өвчнүүд сүүлийн жилүүдэд тогтмол бүртгэгдэж, тархалт ихсэнтэй холбогдуулан хилийн боомт дээр халдвар эсэргүүцэх хариу арга хэмжээний бэлэн байдлыг Буянт-Ухаа боомтод тогтмол хангаж ажиллах зайлшгүй шаардлага тавигдаад байна. Баруун Африкийн улсууд болон Испани, АНУ-д эбола вирусын халдвар тогтмол бүртгэгдэж, нас баралт өндөр байгаа энэ үед Монгол улсын агаарын хилийн нэвтрэх цэгийн хяналтыг сайжруулах, эбола вирусын халдварт эрсдлийн үнэлгээг хийх, эрт сэрэмжлүүлэх, мэдээлэх, бэлэн байдлыг хангах чиглэлээр Буянт-Ухаа дахь Хилийн Мэргэжлийн хяналтын албанаас тушаал, төлөвлөгөө гарган, үе шаттай ажлуудыг авч хэрэгжүүлж, холбогдох мэргэжлийн байгууллагуудтай хамтран ажиллаж байгаа юм. Тус алба нь олон улсын эрүүл мэндийн дүрмээр зохицуулагддаг халдварт өвчин болон бусад эрсдэл өндөртэй халдварт өвчнөөс урьдчилан сэргийлэх, өвчлөл гарсан болон халдварын сэжиг илэрсэн үед халдвар эсэргүүцэх хариу арга хэмжээг хэрэгжүүлж ажилладаг.
Эбола вирусын халдвараас урьдчилан сэргийлэх, өвчлөл гарсан болон халдварын сэжиг илэрсэн үед халдвар эсэргүүцэх хариу арга хэмжээний бэлэн байдлыг хангах хүрээнд төлөвлөгөө боловсруулан ажиллаж байгаа бөгөөд халдвараас урьдчилан сэргийлэх, халдвар эсэргүүцэх хариу арга хэмжээний бэлэн байдлыг хангаж ажиллах талаар Буянт-Ухаа боомт дахь хил,хяналтын байгууллага, авиа компани болон холбогдох байгууллагуудад зөвлөмж хүргүүлж сургалтанд хамруулаад байна. Зорчигчдод зориулан мэдээллийн самбар, зурагт хуудас байршуулан гарын авлагыг бэлтгэн тарааж байгаа юм.
Мөн хилээр нэвтрэх цэгт зорчигчийн биеийн халууныг хэмжигч термокамеруудыг байрлуулж, APISзорчигчийн мэдээллийн системийг суурилуулан голомттой бүс, нутгаас ирж буй зорчигчдийн хяналт,тандалтын судалгаанд ашиглаж байгаа аж. Монгол улсад ирж буй зорчигчдын эрүүл мэндийг МХЕГ-ын даргын 346 тоот тушаалаар батлагдсан “Эрүүл мэндийн тодорхойлох хуудсаар хяналт тавин ажиллаж байна.
Хяналт, эрүүл мэндийн тандалтад нийт 10000 гаруй зорчигч хамрагдсан бөгөөд өвчтэй болон сэжигтэй зорчигч илрээгүй байна.
