Өнөөдөр Улсын Ерөнхий Прокурорын дэргэдэх зөвлөл хуралдаж “Монгол Улсын Прокурорын байгууллагын тухай хууль”-д нэмэлт өөрчлөлт оруулах тухай хуулийн төслийг боловсруулсан ажлын хэсгийн мэдээллийг хэлэлцлээ.

“Монгол Улсын Прокурорын байгууллагын тухай хууль” 1993 онд батлагдсан бөгөөд шүүх эрх мэдлийн шинэчлэлийн хүрээнд шинээр батлагдсан багц хуулиудтай уялдуулан “Прокурорын байгууллагын тухай хууль”-д зарим нэмэлт өөрчлөлт оруулах шаардлага үүссэнийг харгалзан хуульд нэмэлт өөрчлөлт оруулах хуулийн төслийг боловсруулах ажлын хэсэг Улсын Ерөнхий Прокурорын тушаалаар байгуулагдан ажилласан юм.

Монгол Улсын Прокурорын байгууллагын тухай хуульд нэмэлт өөрчлөлт оруулах тухай хуулийн төслийг боловсруулах ажлын хэсгийг Улсын Ерөнхий Прокурорын орлогч Г.Эрдэнэбат ахлаж ажилласан бөгөөд хуулийн төсөлд  Прокурорын байгууллагын үйл ажиллагааны чиг үүрэг, зарчим зэрэг нилээд олон зүйл заалтад  нэмэлт өөрчлөлт оруулахаар санал гаргаж төслийг боловсруулсан байна.

Ажлын хэсгээс боловсруулсан хуулийн төсөл нь Прокурорын байгууллагын үйл ажиллагаагаа ил тод, хараат бусаар явуулах, прокурорын хүлээх хариуцлагыг илүү тодорхой болгоход чиглэгдсэнээс гадна прокурор төр, нийтийн эрх ашгийг хамгаалах хууль сахиулагчийн үйл ажиллагаанд хяналт тавихдаа хүлээх эрх үүргийг нарийвчлан заажээ.

Түүнчлэн прокурор үйл ажиллагаагаа хараат бусаар явуулахад нөлөөлсөн тохиолдолд прокурор нөлөөллийн мэдүүлэг гаргаж байх, прокурорын мэдэгдлийг хүлээн авсан байгууллага ажлын 15 хоног дотор хариу өгч байх, прокурор албан үүргээ гүйцэтгэж байгаад нас барсан бол 15 жилийн үндсэн цалинтай тэнцэх хэмжээний 1 удаагийн буцалтгүй тэтгэлгийг гэр бүлд нь олгож байх, прокурорыг орон сууцтай болгоход нь дэмжлэг үзүүлж байх зэрэг олон тооны зүйл заалтыг хуулийн төсөлд шинээр тусгасан байна.

Мөн зөвлөлийн хуралдаанаас хуулийн төслийг дахин нарийвчлан боловсруулах талаар үүрэг чиглэл өгөгдлөө.

Улсын Ерөнхий Прокурорын дэргэдэх зөвлөлийн хуралдаанаар “Эрүүгийн Байцаан Шийтгэх хуулийн хэрэг бүртгэх мөрдөн байцаах, прокурорын хяналтын ажилд дагаж мөрдөх аргачилсан заавар”-ын төслийг шинэчлэн боловсруулах ажлын хэсгийн танилцуулгыг хэлэлцжээ.

Ажлын хэсгийн ахлагчаар Улсын Ерөнхий Прокурорын туслах МШАХТ хэлтсийн дарга Е.Сагсай “Ажлын хэсэг одоо мөрдөгдөж байгаа прокурорын хяналтын ажилд дагаж мөрдөх аргачилсан заавар”-ыг нарийвчлан судалж аргачилсан зааврын холбогдох заалтыг шинэчлэн боловсруулсан талаар танилцууллаа.

Уг зааврыг хянаж үзээд 1287 заалтыг Эрүүгийн байцаан шийтгэх хуульд нийцүүлэн шинээр тусгаж, 252 заалтыг найруулгын хувьд өөрчилсөн байна. Ажлын хэсэг хяналтын ажлын аргачилсан зааварт прокурорын хийж гүйцэтгэх ажил, эрх үүргээс гадна хэрэг бүртгэгч, мөрдөн байцаагчийн зүгээс хийх ажил, хүлээх үүрэг хариуцлагыг илүү тодорхой болгоход анхаарч ажиллажээ. Ажлын хэсгийн боловсруулж гаргасан аргачилсан заавар нь 24 дэвтэрээс бүрдэх бөгөөд дэвтэр тус бүр нь дотроо дэд гарчиг, тусгайлсан заалт бүхий бүтэцтэй болсон байна.

- Ажлын хэсгийн мэдээлэл, танилцуулгыг хэлэлцсэний дараа Улсын Ерөнхий Прокурор Д.Дорлигжав ажлын хэсгийг тодорхой хэмжээнд ажилласныг тэмдэглээд цаашид төрийн нууцтай холбоотой хэрэгт прокуророос тавих хяналт, гал зэвсэг хэрэглэх тохиолдолд прокуророос хэрхэн зөвшөөрөл өгч, хяналт тавьж байх, гадаад орны мөрдөн байцаах байгууллагтай хэрхэн хамтран ажиллах, эрх зүйн туслалцаа үзүүлж байх, хэрэг бүртгэгч, мөрдөн байцаагч, прокурорыг татгалзсан тохиолдолд ямар арга хэмжээ авах, эрүүгийн хэрэгт эвлэрүүлэн зуучлах ажиллагаа явуулахад прокурор яаж оролцох, ДНК-ийн шинжилгээ хийхэд прокурор хэрхэн хяналт тавьж ажиллах зэрэг асуудлуудыг нэмж судлах,  хяналтын ажлын аргачилсан зааварт тусгах боломжийг судалж шийдвэрлэхийн зэрэгцээ аймаг, нийслэл, тээвэр, дүүргийн прокурорын газруудад хяналтын ажлын аргачилсан зааврын төслийг  хүргүүлж саналыг нь авч боловсруулахыг үүрэг болголоо.