"МИАТ" ХК-ийн WWW.MIAT.COM интернэт сайтад байрлуулсан "Сингапур Улсад зорчих эхний таван нислэг 555 000 төгрөг ба үүнд таксийн үнэ нэмэгдэнэ" гэх зар сурталчилгааны дагуу хэрэглэгч зорчигчийн тийз худалдан авах гэхэд "МИАТ" ХК-иас тийзийн үндсэн үнэ буюу 555 000 төгрөг дээр таксийн 529 000 төгрөг нэмэгдэж 1 084 000 мянган төгрөг болно гэх тайлбар хийж байгаа нь хууль тогтоомжид нийцэж буй эсэхийг ШӨХТГ-аас шалгажээ.

Ингэхэд Сингапур Улсад зорчих нислэгийн тийзний үнэд дээрх хэмжээний такс нэмж авсан нь хэдий үндэслэлтэй боловч таксийн сурталчилгаагаа түгээхдээ таксийн үнэ, хувь хэмжээг тодорхой тусгалгүйгээр хэрэглэгчийг төөрөгдүүлэх замаар татсан үйлдэл нь Зар сурталчилгааны тухай хуулийн 7.2.3-т зар сурталчилгаа түгээхдээ "Хангалттай тодорхой мэдээллийг орхигдуулан, эсхүл мэдлэг туршлага дутмаг буюу итгэмтгий байдлыг нь ашиглан хэрэглэгчийг төөрөгдөлд оруулах"-ыг хориглоно, Хэрэглэгчийн эрхийг хамгаалах тухай хуулийн 12.9-т "Бараа, ажил, үйлчилгээг хууран мэхлэх, төөрөгдүүлэх, хүч хэрэглэх замаар худалдах, гүйцэтгэх, хэрэглэгчийн эрхийг хохироосон гэрээ байгуулахыг хориглоно", Өрсөлдөөний тухай хуулийн 12.1.3-т  "Өрсөлдөөнд харш үр дагавар үзүүлэх зар сурталчилгаа явуулах"-ыг хориглоно гэсэн заалтыг зөрчсөн гэж үзэхээр байсан байна. Тиймээс улсын байцаагчийн дүгнэлт гаргаж зөрчлийг арилгуулсан ба зар сурталчилгаа түгээхдээ таксийн үнийн талаарх мэдээллээ үйлчлүүлэгчдэд тодорхой болгож байхыг үүрэг болгож шийдвэрлэжээ.