Энэ хичээлийн жилээс хэрэгжиж эхэлсэн “Бага боловсролын сургалтын цөм хөтөлбөр”-ийн хэрэгжилт ямар байгаа талаар Баянхонгор аймгийн Боловсролын хэлтсийн дарга Д.Байгальмаагаас тодрууллаа.

-    Шинэчилсэн хөтөлбөрийн хэрэгжилт ямархуу байна, танай аймагт?

-    Юун түрүүнд бэлтгэл ажлаа маш сайн хийж байж хэрэгжүүлсэн хөтөлбөр. Хэрэгжүүлэхийн өмнө үндэсний хэмжээнд 40 лаборатори сургуульд туршсан. Мөн бүх бага ангийн багш нарт шинэ хөтөлбөрийн болоод заах аргын сургалт явуулсан. Маш их бэлдэж байж хэрэгжүүлсэн. Сая бид 10-р сард аймгийнхаа дөрвөн бүсэд очиж, бага боловсролын цөм хөтөлбөр хэрхэн хэрэгжиж байна вэ гэдэгтэй танилцсан. Нэг бүсэд хэд хэдэн сум багтаж байгаа юм. Тэгээд бага ангийн багш нарыгаа цуглуулаад хамгийн шилдэг бага ангийн хичээлийг зааж үзүүлж, хэлэлцүүлэг зохион байгуулсан. Тэгэхэд багш нар бүгд энэ хөтөлбөрийг 100 хувь дэмжиж байгаагаа хэлсэн. Дээр нь шинэ хөтөлбөрөөр хичээллэсэн хоёр сарын хугацаанд багагүй үр дүн үзүүлсэн байна. Хичээлийн явц, арга барил өөрчлөгдөөд эхлэхээр хүүхдүүд хичээлдээ их дуртай, өөртөө итгэлтэй болсон байна.

-    Шинэ хөтөлбөрөөр хичээллэхэд хүндрэлтэй зүйл гарч байна уу?

-  Мэдээж аливаа шинэ зүйл эхлэхдээ шууд дардан замаар явна гэж байхгүй. Олон жил явсан хуучин арга барилаасаа салж чадахгүй байгаа зүйл харагдаж л байна. Гэхдээ их цөөхөн. Ялангуяа эцэг эхчүүдийн хандлагыг өөрчлөхөөр хамтарч ажиллаж байна. Хүүхдээсээ, багш нараас дүн л нэхээд байдаг. Хүмүүжил төлөвшил, зөв харилцааны хичээл дээр хүүхдүүд дэвтэртээ юм бичихгүй. Гэтэл ээж, аав нь ирээд яагаад дэвтэр нь хоосон байна вэ, та нар юм заахгүй байна гэхчилэн гомдоллодог. Ээж аавууд дэвтэр дээр хэдий их юм байна, багш төдий чинээ их юм зааж байна гэсэн хуучинсаг үзэлтэй хэвээрээ байна. Хүүхдээр хуулан бичиг хийлгэж, цээжлүүлэх биш тэднээр өөрсдөөр нь хийлгэж мэдлэгийг нь чадвар, чадварыг нь хэрэглээ болгох явдал шүү дээ. Энэ сургалтын маань гол амин сүнс нь тэр шүү дээ. Үүнийг л эцэг эхчүүддээ захидаг. Хүүхдийнхээ дэвтэр дээрх бичгийн хэмжээ, дүнг хайх, харах биш хүүхэдтэйгээ илүү ярилцаж, ойр байгаасай гэж. Гэхдээ хоёр сарын хугацаанд үнэхээр их өөрчлөлт орсон эцэг эхчүүдийн хувьд ч хүүхдүүдийн хувьд ч тэр. Багш нар ч мөн ялгаагүй.

-   Бага боловсролын хөтөлбөрт бодлогын шинэчлэл хийгээд, хэрэгжүүлж эхлээд удаагүй байтал Засгийн газар огцорчихлоо. Одоо дахиад л нэг сайд гарч ирээд та бүхнээр бас нэг өөр юм хийлгэх байх даа?

-    Бид үүнээс өөрийг хийхийг үнэхээр хүсэхгүй байна. Сүүлийн 20 гаруй жилд хийсэн хамгийн зөв шинэчлэл бол энэ. Одоо л нэг зөв зам руугаа орох нь уу гэтэл ийм зүйл боллоо. Яг үнэндээ бүгд л наадахнаас чинь эмээж байна. Дахиад л энэ салбараар, хүүхдүүдээр тоглох вий. Үүн шиг сайн бодлого, үүн шиг сайн төлөвлөлт дахиж хэрэгжихгүй гэдэгт итгэлтэй байна. Тийм болохоор хэн нь ч сайн болсон бай энэ бодлогыг л үргэлжлүүлээсэй гэж чин сэтгэлээсээ хүсч байна.