Манай улс НҮБ-аас тунхагласан Авлигын эсрэг олон улсын өдрийг найм дахь жилдээ тэмдэглэн өнгөрүүллээ. Энэ өдрөөр дэлхийн улс орнууд “Авлигын гинжийг тасалъя” уриан дор нэгдэж, өргөн хүрээтэй ажил зохион байгуулав. АТГ-ынхан энэ өдрийг угтан төрийн байгууллага болон төрийн өмчит хуулийн этгээд, хувийн хэвшил, иргэний нийгмийн байгууллагуудын дунд “Авлигаас ангид, сайн засаглалын сайн санаачилга-2014” уралдааныг зохион байгуулсан. Уг уралдааны дүнг уржигдар танилцуулж, шагналыг гардууллаа. Энэхүү арга хэмжээнд Нийслэлийн Засаг дарга Э.Бат-Үүл, УИХ-ын Хууль зүйн байнгын хорооны дарга Д.Ганбат, Тагнуулын ерөнхий газрын дарга Б.Хурц, Ерөнхийлөгчийн Хуулийн бодлогын ахлах зөвлөх Ч.Өнөрбаяр тэргүүтэй төлөөлөгчид оролцлоо.Арга хэмжээг нээж, АТГ-ын дарга, тэргүүн комиссар Н.Ганболд хэлсэн үгэндээ “Авлигатай тэмцэнэ гэдгийг дан ганц айлгах, цочирдуулах утгаар хүлээж авах нь өрөөсгөл юм. Албан тушаалын гэмт хэрэгтэй тэмцэж, гэмт үйлдлийг таслан зогсоох нь зөвхөн нэг л талын ажил. Авлигаас ангид төрийн үйлчилгээг иргэд, олон нийтэд тэгш шударгаар хүргэж байгаа арга туршлагыг авлигаас урьдчилан сэргийлэх үйл ажиллагааны тэргүүлэх чиглэл болгон авч үзэх нь зүйтэй. Манай нийгэмд авлигын үндэс суурь, хор уршиг дорвитой арилаагүй боловч төрийн албанд байгаа сайн үйл ажиллагааг улам олон болгож, хүрээг нь тэлье гэсэн зорилгын үүднээс өнөөдрийн арга хэмжээг Авлигатай тэмцэх газар уламжлал болгон зохион байгуулж байгаа нь нийгмийн энэ сөрөг үзэгдлийн хүрээг хумихад тодорхой хувь нэмэр оруулна гэж үзэж байна” хэмээн онцоллоо.
“Авлигаас ангид, сайн засаглалын сайн санаачилга” уралдааны 2014 оны шалгаруулалтаар Нийслэлийн Засаг даргын Тамгын газар, Орхон аймгийн Засаг даргын Тамгын газар, Цагдаагийн ерөнхий газрын эрх бүхий албан тушаалтан Д.Бат-Эрдэнэ, Ж.Шаравнямбуу, “IRIM” судалгааны хүрээлэн, Үйлдвэр хөдөө аж ахуйн яам, нийслэлийн Хан-Уул дүүргийн Засаг даргын Тамгын газар, Дорноговь аймгийн Сайншанд сумын Засаг даргын Тамгын газар, Хөрөнгийн биржийн эрх бүхий албан тушаалтан Н.Баярцэцэг, Иргэний харьяалал, шилжилт хөдөлгөөний ерөнхий газар тодорлоо.
Авлигын эсрэг НҮБ-ын далбаан дор нэгдсэн орнууд энэ өдрийг угтан олон нийтийн дуу хоолойг сонсох, Авлигын эсрэг конвенцид тусгасан үүргүүдийг нийгэмд таниулах учиртай. Монгол Улсын Авлигатай тэмцэх газраас энэ өдрийг угтан “Шударга нийгмийн төлөө хамтдаа” сэдэвт аяныг бүтэн жилийн турш улс орны хэмжээнд зохион байгуулсан юм. Аяны хүрээнд мэдүүлгийн бүрдүүлэлт хариуцсан эрх бүхий албан тушаалтнууд болон орон нутгийн төрийн албан хаагчид, иргэдэд зориулсан олон талт сургалт, ерөнхий боловсролын сургуулийн сурагчддыг оролцуулан “Би дүүдээ шударга ёсыг тайлбарлаж өгсөн” эссе бичлэгийн уралдаан, нийслэлийн ерөнхий боловсролын сургуулийн ахлах, дунд ангийн багш нарын дунд зарласан шударга ёсны сэдэвт хичээлийн хөтөлбөр шалгаруулах уралдаан, их, дээд сургуулийн оюутнуудын дунд “Авлига, ашиг сонирхлын зөрчлөөс урьдчилан сэргийлэх арга зам” сэдэвт эрдэм шинжилгээний бага хурал зохион байгуулж, авлига ба ашиг сонирхлын зөрчлийн сэдвээр бэсрэг жүжиг бэлтгэн олон нийтэд хүргэсэн байна.
Дээрх өдрийг угтсан баярт мэдээ нь манай улс “Транспарэнси интернэшнл” байгууллагын 2014 оны Авлигын төсөөллийн индексийн судалгаагаар 175 орноос 80 дугаар байрт жагссан үзүүлэлт. Шилэн дансны тухай хууль болон нийтийн албан тушаалтныг аливаа эрсдэлээс хамгаалахад чиглэсэн хууль, тогтоомжуудыг баталснаар бид шат ахисан гэж судлаачид үнэлж байгаа. Иймээс ч тус байгууллага Монгол Улсыг авлигын эсрэг тууштай тэмцэж байгаа орноор нэрлэсэн билээ.
