Лхагва гарагт Японы Ерөнхий сайд Шинзо Абэгийн нийслэл Токио хот дахь байшингийн дээвэр дээр нисэгчгүй мөрдөх аппарат суурьлуулсан байсныг олж илрүүлжээ. Албаныхан алсаас удирддаг төхөөрөмжийг нэг бол Ерөнхий сайд Шинзо Абэг тагнах, эсвэл террорист халдлага зохион байгуулах зорилгоор мэдээлэл судалж байсан хэмээн сэжиглэж байна.
Энэ үед Ерөнхий сайд Шинзо Абэ Индонезид албан ёсны айлчлал хийж байгаа юм.
Засгийн газрын тэргүүний албаны өргөөний дээвэрт байсан төхөөрөмж ойролцоогоор 50 см-ийн диаметртэй ч маш жижиг камер суурьлуулсан байжээ. Мөн дөрвөн сэнстэй бөгөөд ямар нэгэн бодис агуулсан жижиг хуванцар савтай байсан байна. Тэрхүү биет дээр “цацраг идэвхит бодистой” гэсэн тэмдэглэгээ байсныг “NHK” агентлаг онцолжээ.
Холбогдох албаныхан утаа цацагч шашктай зүйрлэж буй уг төхөөрөмжийг хэрхэн өндөр хамгаалалттай байшингийн дээвэр дээр гарсан болон хэн үүнийг хийснийг тогтоохоор шуурхай алба байгуулан ажиллаж эхэлжээ.
Японы Засгийн газрын нарийн бичгийн дарга Ёсихиде Суга хэлэхдээ “Япон 2020 онд Олимпийн наадам зохион байгуулах болсонтой холбогдуулан террорист халдлага зохион байгуулахаар тагнасан байж болох юм” хэмээн сэтгүүлчдэд мэдэгдэл хийжээ.
Нисэгчгүй төхөөрөмж хэзээ анх дээвэр дээр газардсан нь тодорхойгүй байгаа юм.
Олон улсын ажиглагчид хэрвээ террористуудтай холбоотой бол энэ нь Японд өстэй “Исламын улс” бүлэглэлийнх байж болзошгүй хэмээн үзжээ.
Д.Идэр
