Нийслэлээс сонгогдсон УИХ-ын гишүүдтэй хотын дарга зөвлөлдөх уулзалт хийлээ.  Уулзалтаар хотын хөгжлийн ерөнхий төлөвлөгөөг танилцуулж, нийслэлийн өнөөгийн байдал цаашид хэрэгжүүлэх ажлуудын талаар санал солилцож,  нийслэлийн эрх зүйн орчныг сайжруулахад дэмжлэг хүслээ.  Нийслэлийн хот байгуулалт, ерөнхий төлөвлөгөөний газрын дарга Э.Анар хотын ерөнхий төлөвлөгөөг төрийн түшээдэд танилцуулав. Улаанбаатар хотын Ерөнхий төлөвлөгөөг 1954 онд 125 мянган хүнтэй байхаар, 1963 онд 250 мянган хүнтэй байхаар, 1971 онд 600 мянган хүнтэй байхаар 1984 онд 850 мянган хүнтэй байхаар хийж байжээ. Харин “Улаанбаатар хотыг 2020 он хүртэл хөгжүүлэх ерөнхий төлөвлөгөөний тодотгол, 2030 оны хөгжлийн чиг хандлагын баримт бичиг”-ийг 2013 онд УИХ-аас баталсан бөгөөд 2030 онд хотод 1 сая 763 мянган хүн амьдрахаар тооцон төлөвлөлжээ.

Баримт бичигт тусгаснаар хотын хөгжлийн тэргүүлэх чиглэлүүдийг эрүүл, аюулгүй “Ногоон хот”, амьдралын таатай орчинг бүрдүүлсэн хот, иргэд хувийн хэвшлийн оролцоонд суурилсан “Сайн засаглалтай” хот, олон төв суурьшлын зохистой тогтолцоонд суурилсан хот, аялал жуучлалын төв хот, олон улсад өрсөлдөх чадвартай хөгжингүй хот болно гэж тодорхойлсон байна. Мөн 2020 оны хотын дүр төрхийг төвийн болон хэрэглээний бүх төрлийн ухаалаг шийдлийг дэмжин, хэрэгцээнээс илүү төлөвлөлтгүй, илүү зардалгүй, ухаалаг, хүрээлэн буй орчинд ээлтэй, эдийн засгийн эрч хүчтэй хот болсон байна гэж үзэж байгаа юм. Хотын ерөнхий төлөвлөгөөнд тусгаснаар Улаанбаатар хотын төвлөрлийг сааруулах бодлогын хүрээнд Налайх, Багахангай, Багануур дүүргийг үйлдвэрлэл, үйлчилгээний тодорхой чиглэлээр төрөлжүүлэн дагуул хот болгон хөгжүүлэхээр заасан гэдгийг тэрээр хэллээ.

Мөн Хөшигийн хөндийд шинээр барих олон улсын нисэх онгоцны буудлыг түшиглэн засвар үйлчилгээ, мэдээлэл технологи, худалдаа бизнес, төмөр зам, агаарын тээврийн ложистик төвлөрсөн “Аэро сити”  шинэ хот байгуулах,  Эмээлт, Аргалант орчмыг Эмээлт өртөөг түшиглэн хөнгөн аж үйлдвэрийн парк, хөдөө аж ахуйн түүхий эдийн бирж, ложистик, агуулахын аж ахуйг хөгжүүлсэн шинэ хот байгуулахаар төлөвлөжээ.

Гачуурт, Өлзийт хороолол, Био, Сонгино, Партизан Жаргалант, Рашаантыг дагуул хот маягын тосгон болгон хөгжүүлэхээр тусгасан байна. Тухайлбал  Гачуурт тосгоныг 1164 га нутаг дэвсгэртэй, 7000 хүн ам бүхий, амралт зугаалга, зуслан суурьшил, байгалийн аялал жуулчлал хөгжсөн тосгон болгохоор төлөвлөсөн байна. Харин Өлзийт хороог 923,1 га нутаг дэвсгэртэй, 5000 хүн амтай, жимс жимсгэнэ, хүнсний нарийн ногооны хүлэмжийн аж ахуй, жижиг, дунд үйлдвэрлэл түлхүү хөгжүүлсэн, Улаанбаатар хотын дагуул хот маягийн тосгон болгон хөгжүүлнэ гэж Улаанбаатар хотын Хөжглйин ерөнхий төлөвлөгөөний баримт бичигт тусгажээ.

Дагуул хот сууринг Улаанбаатар хоттой холбосон автозамын сүлжээг сайжруулж, Богд уулын өврөөр шинэ нисэх онгоцны буудлаар дайруулан гол замтай холбосон хурдны зам тавих юм. Налайх-Улаанбаатарыг холбосон автозамыг өргөтгөж,  хотын дундуур гарсан хурдны замыг Налайхын замтай зэрэгцүүлэн үргэлжлүүлж, Налайх хоттой холбохоор тусгажээ. Хотын гудамж замын сүлжээг эрс шинэчлэн, замын хөдөлгөөний нягтралыг сарниулах, замын хөдөлгөөнийг жигд тархаах зорилгоор шинээр төлөвлөж буй төв, дэд төвүүдийг холбосон, хотын төвийг тойрсон 4 цагриг зам, хэвтээ чиглэлд хотын дундуур гарсан зэрэгцээ 6, босоо чиглэлд зэрэгцээ 9 гол гудамж зам байхаар  төлөвлөсөн байна. Ингэснээр 2030 онд Улаанбаатар 60 км урттай хурдны замтай,  хатуу хучилттай замын нийт урт 3000 километрт хүрэх гэж тооцжээ.  Одоогийн байгаа ногоон байгууламжийн хэмжээг ч нэмэгдүүлж, хотжилтыг хязгаарлах бүсүүдийн хил заагийг шинээр тогтоох юм байна. Хотын ерөний төлөвоөгөөг  хэрэгжүүлж чадвал Улаанбаатар хот “Аз жаргалтай хот” болж чадна гэдгийг тэрээр тодотгов гэж Нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.