2016 оны УИХ болон нийслэлийн ИТХ-ын сонгуулийн сурталчилгааны мониторингийн дүнг хэвлэлийн хүрээлэнгийн дэргэдэх судалгааны албанаас танилцууллаа. Өдөр тутмын таван сонин, долоо хоног тутмын нэг сонин, мэдээллийн таван сайтын 32 хоногийн мэдээлэлд мониторинг хийсэн байна. Түүнчлэн нийгмийн сүлжээнд анх удаа мониторинг хийж 20 нэр дэвшигчийн фэйсбүүк аккаунт, 20 нэр дэвшигчийн твиттер аккаунт, улс төрийн чиглэлээр дагнан бичдэг долоон сэтгүүлчийн твиттер болон фэйсбүүк аккаунтын мэдээлэлд ажиглалт хийжээ.
Энэ удаагийн мониторинг нь сонгуулийн сурталчилгааны өмнөх үеийн сонгуулийн сурталчилгаа албан ёсоор эхэлсэн үеийн мэдээлэлтэй жишихээс гадна сонины мониторингийн дүнг 2012 оны үр дүнтэй харьцуулсанаараа онцлог байв.УИХ-ын 2012 оны сонгуулиар тогтмол хэвлэлүүд сонгуулийн сурталчилгаанд ихээхэн ач холбогдол өгч байсан бол 2016 оны сонгуулиар ил, далд хэлбэрийн сурталчилгаа багасаж, сонгуулийн талаарх сэтгүүл зүйн бүтээлийн тоогоо нэмж сонгогчдын боловсролд зориулсан мэдээллийн эзлэх хувийг өсгөсөн нь эерэг үр дүн байлаа.
Сонгуулийн сурталчилгааны өмнө сонин, сайтууд ойролцоогоор дөрвөн бүтээлийнхээ нэгд эмэгтэй нэр дэвшигчдийг дурьдаж байсан бол сонгуулийн сурталчилгааны үеэр эмэгтэй нэр дэвшигчдийн тухай мэдээлэл буурчээ. Түүнчлэн эрэгтэй улс төрчид эмэгтэй нэр дэвшигчдийн тухай дурьдсан, иш татсан мэдээлэл цацагдсангүй.
Энэ удаагийн сонгуулийн мэдээлэл, сурталчилгааны нэг онцлог нь намууд болон нэр дэвшигчид нийгмийн мэдээллийн сүлжээг слнгуулийн сурталчилгааны чухал индэр болгон ашиглалаа. Жижиг намууд болон бие даагчдын төлөөлөл твиттерийг илүүтэй ашигласан бол том намууд ялангуяа АН фэйсбүүкт илүүтэй анхаарлаа хандууоан сонгуулийн сурталчилгаа хийжээ.
Сонгуулийн үеэр хэвлэмэл сонинууд олон нийтэд мэдээлэх, танин мэдүүлэх үүргээ биелүүлэхэд түлхүү анхаарсан бол цахим сайтууд мэдээллийн хэрэгсэл болон нийгмийн мэдээллийн сүлжээ сурталчилгааны индэр байх үүргээ илүүтэй гүйцэтгэсэн хэмээн Хэвлэлийн хүрээлэнгийн гүйцэтгэх захирал М.Мөнхмандах мэдээллээ. Мөн цахим сайтуудыг сонгогчдын боловсролд түлхүү анхаарч ажилласан гэдгийг тэрээр онцолж байсан юм.
Тодуулбал сонгуулийн албан ёсны сурталчилгаа эхэлснээр мэдээллийн хэрэгсэл сонгогчдын боловсролд зориулсан мэдээлэлд анхаарч эхэлсэн бөгөөд тогтмол хэвлэлээс илүүтэй цахим мэдээллийн хэрэгсэл сонгогчдыг боловсруулах талд онцгой ач холбогдол өгчээ. Түүнчлэн нийгмийн мэдээллийн сүлжээгээр дамжуулан бие даан нэр дэвшигчид сонгогчдын боловсролд зориулсан мэдээллийг түгээхэд өөрсдийн хувь нэмрээ оруулж байжээ. Ийм төрлийн мэдээлэлд сонгуулийн хуулийн зүйл заалтыг тайлбарласан, намуудын мөрийн хөтөлбөрийг харьцуулсан, намуудын амлалтын талаар задлан шинжилсэн, сонгогчид саналаа хэрхэн өгөх тухай зааварчилгаа зэрэг багтаж байна.
