Шүүхийн шинжилгээний үндэсний хүрээлэнгээс хордож амиа алдсан хүмүүсийн цогцонд хийсэн шинжилгээний хариу гарсан талаар мэдээллээ. Тодруулбал Баянгол дүүргийн нутаг дэвсгэрт иргэд шингэн зүйл ууж хордсон гэсэн дуудлагын дагуу Нийслэлийн шүүхийн шинжилгээний газрын шинжээчид ирж, хэргийн газарт байсан хуванцар савтай болон шилтэй шингэнүүдээс  дээж авчээ. Мөн нас барсан иргэдийн цогцост задлан шинжилгээ хийхэд цуснаас нь метилийн спирт илэрсэн байна. Нарийн  буюу эсийн шинжилгээний хариу 7-14 хоногийн хугацаанд гарах тул хараахан бэлэн болоогүй байгаа аж.

Нас барсан иргэдийг үхэлд хүргэсэн метилийн спирт нь шил арчигч болон аяга таваг угаагч ахуйн хэрэглээний шингэнд агуулагддаг байна. Иймд албаны хүмүүсийн тайлбарласнаар нас барсан иргэд "Гайхмаараа" шил цэвэрлэгч шингэнээс хордсон байх магадлалтай аж.

Метилийн спирт нь ахуйн цэвэрлэгээ, технологийн зориулалттай бөгөөд уусан тохиолдолд шууд үхэлд хүргэх аюулт бодис гэдгийг Нийслэлийн Эрүүл мэндийн газрын дарга Л.Төмөрбаатар тайлбарлалаа. Тэрбээр нас барсан таван иргэний дөрөв нь хордож нас барсан бөгөөд нэг иргэн өвчний улмаас нас барсан болохыг мэдээллээ.

Нийслэлийн мэргэжлийн хяналтын газраас үүссэн нөхцөл байдалтай холбогдуулан 59 шил архинаас дээж авч, шинжилгээнд хамруулжээ. Шинжилгээгээр уг архинууд стандарт, чанар аюулгүй байдлыг хангасан болохыг тогтоосон байна. Харин “Найрсаг” нэрийн 6 архины хатуулгын хэмжээ нь буурсан үзүүлэлт гарчээ. Хаяг, шошгон дээр архины хатуулгыг 39 градус гэж бичсэн ч шинжилгээнд хамруулж үзэхэд 28-30 гарсан байна. Улмаар Нийслэлийн мэргэжлийн хяналтын газрын даргын тушаалаар  “Мөнхжин Од” ХХК-ийн үйлдвэрт хяналт, шалгалт явуулжээ. Шалгалтын явцад “Нарантуул” захаас болон зарим дэлгүүрээс татаж авсан уг үйлдвэрийн архинууд хатуулга бага гэсэн хяналтын дүгнэлт гарсан байна. Гэвч хатуулга хүрээгүй байдал нь хүний амь насанд нөлөөлөхгүй. Мөн энэхүү архинаас метилийн спирт илрээгүй учраас нас барсан  иргэдийн үхэлд “Найрсаг” архи нөлөөлөөгүй болохыг Нийслэлийн мэргэжлийн хяналтын газрын дарга Л.Эрдэнэчулуун хэллээ.

“Найрсаг” архины үйлдвэр болох “Мөнхжин од” компаниас шалгалтын явцад тодорхой зөрчил илэрсэн байна.  Тухайлбал, архины таглаа саарал болон цэнхэр гэсэн хоёр өнгөтэй байжээ. Үйлдвэрийн ажилчид иргэд гар аргаар дуурайлган үйлдвэрлэж буй талаар хэлсэн ч уг хоёр өөр өнгийн таглаа үйлдвэрээс нь олдсон тул улсын байцаагч нар хуурамч архи үйлдвэрлэж байж болзошгүй гэж үзэн энэ сарын 17-ноос үйл ажиллагааг нь зогсоожээ.