Таны хүүхэд хаана, хэдэн төгрөгний үнэтэй, ямар хүнс хэрэглэдгийг та мэдэх үү? Хүн төрөлхтний анхдагч хэрэгцээ болох хоол хүнс, орон байр, хувцас, хэрэглээ зэргээрээ XXI зууны нийслэл Улаанбаатарт амьдардаг залуус хоцроогүй.

Гэлээ ч бидэнд өдөр тутам зайлшгүй шаардагдах хоол хүнсний эрүүл, аюулгүй байдал хэр байна вэ? Тэр дундаа их дээд сургуулийн болоод ЕБС-ийн сурагчдын хооллолт хамгийн эмзэг сэдэв болоод байна.

Өглөөний хоолыг өөртөө

Өдрийн хоолыг найздаа

Оройн хоолыг дайсандаа 

Өглөөний цайгаа ууж амжихаас илүүтэйгээр уугаагүй гарсан нь дийлэнх хувийг эзэлнэ. Өглөөний цайгаа уулгүйгээр өдөр хүртэл ‘’тэсэж’’ өлөн элгэн дээрээ хийжүүлсэн ундаа, хайрсан хуушуур халаасан пирошки идэх нь таргалалт, чихрийн шижин өвчний гол эх үүсвэр  ийг тавьж байна. Ходоодны өвчлөл залуужиж, 20 настай залуу эмнэлгээр “эргэлдэх” нь хэвийн үзэгдэл болжээ.

Манай улс ‘’Үдийн цай’’ хөтөлбөрийг Боловсрол, Соёл, Шинжлэх Ухааны болон Эрүүл Мэндийн Сайдын хамтарсан 2006 оны 379/341 тоот тушаалаар хэрэгжүүлж эхэлсэн. Тус хөтөлбөрт ЕБС-ийн бага ангийн сурагчид хамрагддаг.

• - "Эгчээ, 2 пирошки авъя. Кетчуп байна уу?"
• - Халаалгах уу?

Энэ бол цаг, минут, завсарлагаа бүрээр өрнөх харилцан яриа

Таны харж буйгаар энэ бол гялгар уут биш амны салфетканд шингээсэн тос

Сургуулийн орчинд байрлах зоогийн газар, буфетнууд оюутны болоод сурагчдын хөлөөр тасрахгүй. Үйлчлүүлэгч ихтэй тул дор хаяж өмнөх өдөр нь гурилаа зуурч, исгэж бэлтгэдэг байна. Энэ тохиолдолд бүтээгдэхүүний орц найрлаганд багтах шимт амин дэмүүд устаж, ашиггүй нянгаар баяждаг. Иссэн гурил, удсан мах нь хүний биед сөрөг нөлөө ихтэй төдийгүй хоолны хордлого цаашлаад таргалалтыг эх суурийг тавьдаг  .

Пирошки нь нь хямд үнэтэй, илчлэг өндөртэй тул сурагчид ихээр хэрэглэх шалтгаан болж байна. Уг бүтээгдэхүүний тосны агууламж 21.5 гр, давс 1.2 гр байгаа нь эрүүл бус хүнсний бүтээгдэхүүнд ангилалд хамааруулж байгаа ба сургуулийн орчинд худалдаалахыг хязгаарлах шаардлагатай юм. Пирожки шарахад удаан хэрэглэсэн ургамлын тос нь чанар нь муудаж транс тос болон хувирдаг байна. ДЭМБ-аас хүүхдийн хүнсэнд транс тосыг хэрэглэхийг хориглодог бөгөөд эрүүл мэндэд өндөр эрсдэлтэй тос юм  .

Тос даасан пирошки, хийжүүлсэн ундаа, хайрсан хуушуур, төрөл бүрийн түргэн хоол болох бэлэн гоймон, лаазалсан бүтээгдэхүүн гээд бие махбодид хоол бус хор болох хүнсийг бид хэрэглэсээр байна. Бидний нэрлэдгээр ширхэгийн хоолыг богино долгионы зууханд халаан хэрэглэгчийн гар дээр хүргэдэг. Гялгар уутанд хийж өндөр хэмээр халаасан бүтээгдэхүүн хамгийн муу.

Их дээд сургуулиуд болоод ЕБС-ийн эргэн тойронд байрлах зоогийн газруудын хоолны цэсэнд мантуун бууз, пирошки 600, ороомог 800, соустай будаа 1500 төгрөг гэх мэтчилэн үнийн дүнг бэлхэнээ харж болно. Төмстэй, кимчитэй, махтай гэх мэтчилэн төрөл төрлийн тос даасан пирошки таныг угтана. Энэ бүхэн чанарын шаардлага хэр хангадаг вэ? Ханасан тосонд хэт удаан чанаж шарсан бүтээгдэхүүнүүд ходоодны жинхэнэ дайсан.

Та өглөөний хоолыг өөртөө зориулж, өлөн элгэн дээрээ буцалсан ус ууж өдөр бүр ойр ойрхон хугацаанд бага багаар хоолловол энэ хамгийн зөв хооллолт  . Богино долгионы зууханд гялгар уутаар ороож халаасан бүтээгдэхүүн нь хүний биед хамгийн сөрөг нөлөөтэйг дурдсан. Энэ бүгдээс татгалзахын тулд та өглөөний цайгаа эртлэн бэлдэж өдөр тутам өөрийн гараар бэлтгэсэн эрүүл чанартай хоол хүнсийг идэж, хэрэглэх нь чухал.

Эрүүл мэндээ эртнээс хайрлая, залуусаа