Өнөөдөр БСШУСЯ-ны Хурлын танхимд “Монголын инновацийн 7 хоног” арга хэмжээний албан ёсны нээлтийн ажиллагаа боллоо.
“Монголын Инновацийн 7 хоног” арга хэмжээг 2015 оноос олон улсын туршлага, дэлхий нийтийн жишгийн дагуу инновацийн соёлыг төлөвшүүлж, бүтээлч сэтгэлгээг хөгжүүлэх, түншлэл, төр, хувийн хэвшлийн хамтын үйл ажиллагааг өргөжүүлэх зорилгоор энэ жил 4 дэх удаагаа зохион байгуулж байна.
Хамгийн энгийнээр тайлбарлахад, аливаа мэдлэгийг эдийн засгийн эргэлтэд оруулах үйл явцыг инноваци гэж ойлгож болох юм. Өнөөдөр олон улсад инновацийг бүтээгдэхүүний, үйл явцын, бүтэц, зохион байгуулалтын, маркетингийн, логистикийн инноваци гэж ангилдаг байна. Монгол Улсад инноваци хоёр төрлөөр үүсч, хөгжиж байна. Нэгдүгээрт, шинэ санаанд судалгаа боловсруулалт, технологийн туршилт, зүгшрүүлэлт хийгдсэний дараа оюуны өмчид бүртгүүлж, бүтээгдэхүүн гаргаж, зах зээлд нийлүүлэх замаар хөгжиж байна. Хоёрдугаарт, оюуны өмч, патентгүйгээр инноваци өөрөө бий болж байгаа юм.
Инновацийг өргөжүүлэн хөгжүүлснээр инновацийн бүтээгдэхүүн, үйлчилгээ, үйлдвэрлэлийг хөгжүүлэх, өндөр технологийг нэвтрүүлэх, нутагшуулах, чанар хүртээмжийг нь дээшлүүлдэг байна. Үүний зэрэгцээ оюуны өмчийг эдийн засгийн эргэлтэд оруулах, мэдээлэл, үйлчилгээг иргэдэд хүргэхэд инновацийн үйл ажиллагааг чиглүүлснээр тухтай амьдрах боломжийг сайжруулахаас эхлээд олон талын ач холбогдолтой юм.
Энэ жилийн арга хэмжээг БСШУСЯ, Нийслэлийн үйлдвэрлэл, инновацийн газар, Дархан-Уул аймгийн ЗДТГ, Шинжлах ухаан технологийн сан, ШУА, МҮХАҮТ, ШУТИС, СУИС, ХААИС, БХИС, МУИС, АШУҮИС, МУБИС, МТҮП, Монголын залуу эрдэмтдийн холбоо ТББ, Монголын инновацийн холбоо ТББ, Гарааны бизнесийг дэмжих байгууллагууд- “Start Up Mongolia” ТББ, “Work Central” ХХК, “Start Up Marketing space” ХХК, “What3words” зэрэг байгууллагууд хамтран зохион байгуулж байгаа юм.
“Монголын инновацийн 7 хоног-2018” арга хэмжээний онцлогийн талаар БСШУСЯ-ны Инновацийн хэлтсийн дарга Д.Жаргалмаагаас зарим зүйлийг тодрууллаа.
-Энэ удаагийн “Монголын Инновацийн 7 хоног”-ийн гол онцлогийн талаар сонирхуулна уу?
-Онцлог гэвэл “ХАА-н технологи, инноваци 2018” форум, үзэсгэлэнг Дархан-Уул аймагт анх удаа гаргаж байна. Өмнө нь энэ үзэсгэлэн зөвхөн нийслэлд болж байв. Дархан-Уул аймгийн ЗДТГ-тай хамтран Хөдөө аж ахуй, газар тариалангийн салбарт үйл ажиллагаа эрхэлж буй аж ахуйн нэгж, байгууллага, эрдэм шинжилгээний байгууллага, их дээд сургуулийн инновацийн үйл ажиллагааны үр дүн, шинэ техник технологи, бүтээгдэхүүн, үйлчилгээг нийтэд танилцуулах форум, үзэсгэлэнг зохион байгуулах юм. Мөн гарааны бизнесийг дэмжих чиглэлээр үйл ажиллагаа явуулдаг хамтын оффиссын нэгдсэн чуулга-уулзалтыг энэ сарын 12-нд “Монголын инновацийн 7 хоног” арга хэмжээний хүрээнд анх удаа санаачлан зохион байгуулна. Энэ удаагийн чуулганыг олон улсад амжилттай яваа хамтын оффисуудын үүсгэн байгуулагчид болон Ази Номхон далайн Хамтын оффисуудын холбоо /CAAP/-той хамтран зохион байгуулж байна. CAAP нь бүсийн хэмжээнд хамтын оффисуудын хамгийн том Unconference-ийг зохион байгуулдаг бөгөөд "Co.Mo Unconference 2018"-ийг бүсийн хэмжээнд Монголд анх удаа зохион байгуулж байгааг Монголын хамтын оффисуудын дэлхийд гарах, олон улсын хамтын оффисуудын туршлагаас суралцах том боломж гэж бид харж байна. Чуулганд Тайланд, Канад, АНУ, Сингапур улсаас хүндтэй зочид ирж илтгэл тавина.
-“Аж үйлдвэрийн 4 дэх хувьсгалын үе ба Монгол Улсын хөгжлийн асуудлууд” сэдэвт эрдэм шинжилгээ, онол практикийн бага хурал ихээхэн анхаарал татаж байгаа энэ талаар юу хэлэх вэ?
-Шинжлэх ухааны академиас тус эрдэм шинжилгээ, онол практикийн бага хурлыг зохион байгуулна. Монгол Улс зөвхөн уул уурхай, эрдэс баялагаа ашиглан хөгжинө гэхээс илүүтэй мэдлэг оюунаараа хэрхэн хөгжих тухай ярих цаг ирсэн. Дэлхий нийт өнөөдөр аж үйлдвэрийн 4 дэх хувьсгалын тухай ярих болсон. Ойрын үед эрчимтэй үр нөлөөгөө үзүүлэх олон салбар бий. Хиймэл оюун ухаан, сансрын технологи, дрон технологи, роботын технологи гэсэн энэ салбаруудыг онцолж болно. Иймд уг хурлаар Монгол Улс аж үйлдвэрийн 4 дэх хувьсгалыг хэрхэн угтан оролцох, яаж хөл нийлүүлэн хөгжих гээд маш өргөн сэдвийн хүрээнд хэлэлцэх юм.
- Энэ арга хэмжээний хүрээнд залууст хандсан ямар ажил зохион байгуулах бол?
-"Master & Doctorate Student’s-2018" магистрант, докторант оюутнуудын эрдэм шинжилгээний бага хурлыг БСШУСЯ, Монголын Залуу эрдэмтдийн холбоо, ШУТИС болон их дээд сургуулиудын эрдэм шинжилгээний байгууллагатай хамтран 3 дахь жилдээ зохион байгуулна. Хурлын зорилго нь магистрант, докторант оюутны судалгаа, шинжилгээний ажлыг дэмжих, залуу судлаач нарт судалгааны үр дүн, бүтээлээ танилцуулах боломж олгоно. Улмаар шинжлэх ухаан, технологийн салбарын хүний нөөцийг чадавхижуулан, эрдэмтдийн залгамж халааг бэлтгэх зорилготой. Мөн шинжлэх ухааныг төр, хувийн хэвшил болон олон нийтэд сурталчилан таниулахад чиглэгдэнэ. Судлаачид өөрсдийн судалгааны ажлаа танилцуулж, шалгарсан магистрант, докторантын тус бүр нэг шилдэг бүтээлд /Best Paper Awards/ өргөмжлөл болон мөнгөн шагналаар урамшуулна. Энэ хурал англи хэл дээр явагддаг гэдгээрээ онцлогтой. Мөн Залуучуудын гарааны бизнесийн “START-UP WEEKEND” арга хэмжээ болно. Нийслэлийн залуучууд, их дээд сургуулийн оюутнуудын дунд гарааны бизнесийн шилдэг төсөл шалгаруулах арга хэмжээ болно. Оролцогчид 54 цагийн туршид өөрсдийн шинэ санаагаа хөгжүүлэх, гарааны бизнес төлөвлөгөө боловсруулах, хөрөнгө оруулалтаа тооцоолж, компаниа байгуулах зэрэг бизнес эрхлэлт, энтрэпренершипийн маш чухал туршлагуудыг олж авах оюутан, залууст ихээхэн өгөөжтэй арга хэмжээ болох юм.
Эх сурвалж:http://montsame.mn
