Улаанбаатар хотод “Өнөр бүл хүүхдийн төв” гэх нэгэн өнөр өтгөн гэр бүл байх. Өнөр өтгөндөө бүр 180 гаруй хүүхэд энд нэгэн гэр бүл болон амьдарч, эрдэмд шамдаж, дугуйлан, секцэнд хамрагдаж, томчууд нь сурсан мэдсэнээ дүү нартаа зааж, хөл хөөр болцгооно.
Удахгүй өнөр бүлийн энэ олон хүүхдүүд бүтэн жил юу сурч, хэрхэн сурсанаа тайлагнаж, тайлан тоглолтоо хийхээр бэлтгэлээ базаагаад байна. Тэнд яруу тансаг дуу хуур, ялдам наалинхай бүжиг, яруу найраг, уран нугаралт, уянга төгс магтаал эгшиглэнэ. Өнөр бүлийнхэн ямар их авьяаслагийг та энэ сарын 12-ны 14 цагт Тусгаар тогтнолын ордонд ирж үзэж болно.
Ерөнхий сайд У.Хүрэлсүх Шадар сайд байхадаа тус төвд айлчлан ирж байсан гэгээн дурсамж бий. Шадар сайдын айлчлан ирсэн тэр өдрийн тухай тус төвийн хүүхдүүд одоо ч дурсан ярьдаг. Зарим нь бүр Ерөнхий сайд У.Хүрэлсүхийг манай сайд ч гэх нь бий. Тэрээр тус төвийн хүүхдүүдтэй уулзалт хийх үеэрээ жилд нэг удаа заавал нэг удаа ирж байна гэсэн аж. Хүүхдүүд хүний амласан, хэлсэн бүхнийг мартана гэж байхгүй, ой тогтоолт сайтай. Тиймдээ ч тэд “Ерөнхий сайд У.Хүрэлсүх манай төвд жилд нэг удаа заавал ирж байна гэж амласан, тийм ээ” хэмээн итгэлтэйгээр өгүүлэх. Хүний өмнөөс хариу өгч болохгүй ч багш нар нь “Тийм ээ” л гэж хариулдаг гэсэн. Тиймээс ч энэ удаагийн тайлан тоглолт дээрээ Ерөнхий сайд У.Хүрэлсүхийг ирнэ хэмээн итгэж, баяр хүргэн бидэнтэй гар барина хэмээн хөөрцөглөсөн бяцхан үрс тоглолтондоо улам шамдан бэлдэж байгаа гэсэн шүү.
Энэ удаагийн тайлан тоглолт дээрээ Өнөр бүлийн хүүхдүүд хайртай, дотно бүх хүмүүсээ ирнэ хэмээн хүлээж, тэдэнд талархсан сэтгэлээ сурсан мэдсэн бүхнээрээ илэрхийлэхийг тэсэн ядан хүлээж байна.
Энэхүү тайлан тоглолт нь жилдээ ганц л удаа болдог болохоор харьяалдаг сайд, хамаардаг дарга нар нь бүгд тус тоглолтод ирэх биз ээ. Хүүхдийн төлөө халуун сэтгэлд харам байх учиргүй дарга нарыг “Өнөр бүл хүүхдийн төв”-ийн тоглолт дээр хэрхэн ирж оролцохыг харах л үлдлээ. Цагийн зүү урагшилж, маргааш гэдэг өдрийн нар мандахад тун багахан хугацаа үлдлээ. Хүүхдийн төлөө цохилох зүрхтэй бүхэн маргаашийн ажлаа эртлэн зохицуулж, Өнөр бүл хүүхдийн төвийн бяцхан үрсийн дуун цэнгүүнийг үзэн алжаалаа тайлж, хүүхэд бүхэнд алга ташилтаар урам өгнө гэдэгт итгэж байна.
Хүүхэд бүхэнд хайр, халамж хэрэгтэй. Та хайр халамж өгч чадахгүй ч алга ташилтаар Өнөр бүлийн бяцхан үрсэд урам өгч чадна. Ерөнхий сайд ч бай, эгэл жирийн нэгэн ч бай хэн байх нь хамаагүй хамгийн гол нь та чин сэтгэлээсээ тус тоглолтод хүрэлцэн ирж алга ташилтаар урам өгснөөр тэдэний ирээдүйд гэрэл асаана гэдэгтээ итгээрэй.
Сэтгэгдэл (2)