Техник технологи өндөр хурдацтай хөгжиж байгаа өнөө үед интернэтийн хэрэгцээ шаардлага улам л өсч байна. Үүнтэй зэрэгцээд цахим гэмт хэргийн тоо жил ирэх тусам өсөн нэмэгдэх боллоо. Тэр дундаа хүүхдүүд цахим хэрэг үйлдэх, цахим гэмт хэрэгт өртөх, холбогдох тохиолдол ч нэлээд гарах болсон. Иймээс энэ төрлийн гэмт хэргээс урьдчилан сэргийлэх үүд¬нээс энэ талын мэдлэгтэй байх зайлшгүй шаардлагатай байгаа юм.
Монгол Улсад гурван сая орчим гар утас хэрэглэгч байгаа аж. Үүнээс 1.4 сая орчим хүн фэйсбоок хэрэглэдэг гэсэн судалгаа байна. Харин манай улсад 1.2 сая хүүхэдтэй. Эдгээр хүүхдүүдээс 600-700 мянга орчим хүүхэд ухаалаг гар утсыг хэрэглэдэг аж. Ухаалаг гар утас хэрэглэж байгаа хүүхдүүд ямар нэгэн цахим хаягтай. Тэд цахим орчинд чөлөөтэй нэвтэрдэг гэж хэлж болно. Цахим хаяг ашиглах эерэг хандлага байгаа хэдий ч үүнийг дагаад сөрөг нөлөөлөл ч их гардаг. Мөн цахим орчинд хүүхдүүд эцэг эхийн хяналтгүй болдог. Үүнээс болж хүүхэд уруу татагдаж, залилан хийх зэргээр аливаа гэмт хэрэг үйлддэг, эсвэл золиос болдог аж. Тухайлбал, сүүлийн нэг жилийн хугацаанд хүүхэд цахим сүлжээ ашиглаж 15 иргэнийг залилсан гэмт хэрэг бүртгэгджээ.
Мөн цахим сүлжээ ашиглан бие үнэлэх, садар самууныг сурталчлах асуудал ч цөөнгүй гарч байна. Энэ оны хоёрдугаар сард эрүүгийн цагдаагийн газартай хамтарч цахим сүлжээ ашиглан биеэ үнэлж байсан этгүүдийг илрүүлэн шалгаж эхэлсэн. Цагдаагийн байгууллагаас садар самууныг сурталчилж байгаа хаягийг устгасны дараа дахин нээдэг аж. Үүнийг цагдаагийн байгууллагаас таслан зогсоох, урьдчилан сэргийлэх ажлыг хийсээр байгаа. Хэдийгээр хууль хяналтын байгууллага ажиллаж байгаа ч гэсэн эцэг эхчүүд хүүхдээ цахим гэмт хэрэгтэн, цахим гэмт хэргийн золиос болохоос урьдчилан сэргийлэх хэрэгтэй. Хүүхэд хамгааллын тухай хуулинд эцэг эхчүүд хүүхдээ хэрхэн хамгаалах талаар тодорхой зааж өгсөн. Тухайлбал, Гэр бүлд, боловсролд, эрүүл мэнд, цахим орчин, олон нийтийн арга хэмжээнд хүүхдийг хамгаалах хэрэгтэй. Хүүхэд сургууль цэцэрлэгт очлоо гэхэд 4-5 цагийг боловсролын байгууллагад өнгөрөөдөг. Харин 18-19 цагийг гэр бүлтэйгээ өнгөрөөж байгаа. Иймээс хүүхэд хүмүүжлийнхээ 70-80 хувийг гэр бүлээс авдаг байна. Тэд гэр бүлээс гэмт хэрэгтэн болох уу, эсвэл эерэг хүн болох уу гэдэг бүх хандлага гэр бүлээс шалтгаалах юм.
Хүүхдүүд эрүүгийн хуулинд заасан 32 гэмт хэрэгт холбогдож байна
Манай эцэг эхчүүд хүүхдээ цахим орчинд юу хийж байна гэдэгт анхаарал тавихаас илүүтэй өөрсдөө цахим хаяг нээлгэх, найзын хүсэлт яаж явуулах зэргийг мэдэхгүй болохоор хүүхдээсээ асууж тусламж авдаг. Ингээд хүүхэддээ гар утсаа өгчихдөг. Үүний цаана ямар асуудал бий болж байгааг эцэг эхчүүд тэр болгон мэддэггүй, анзаардаггүй. Харин хүүхэд нь интернэт орж янз бүрийн сайт руу хандалт хийдэг. Ингээд хүүхэд олон мэдээлэл аваад ирэхээрээ түүнийгээ эрэмбэлж чаддаггүй. Мэдээллээ эрэмбэлэх чадваргүйн улмаас цахим тоглоомд донтдог. Энэ донтож байгаа асуудал нь нэг өдөр цахим тоглоом тоглож, нэг удаа интернэт орсноос болохгүй. Хэд хэдэн сарын хугацаанд орсны дараа донтож эхэлдэг юм байна. Сүүлийн гурван жилийн байдлаар сэтгэцийн эрүүл мэндийн төвд 209 хүүхэд цахим тоглоом, фэйсбүүкт донтож эмчлүүлжээ. Мөн өнгөрсөн 2017 онд 1658 цахим гэмт хэргийн улмаас 1757 хүүхэд хохирсон. Мөн 1948 цахим гэмт хэрэгт 1066 хүүхэд холбогдож шалгагдсан байна. 2000 оны үед хүүхэд зодоон, хулгай гэсэн хоёрхон төрлийн гэмт хэрэгт холбогддог байсан. Харин одоо хүүхдүүд эрүүгийн хуулинд заасан 32 гэмт хэрэгт холбогдож байна. Энэ нь хүүхдийн хүлээн авч буй цинзергүй мэдээлэлтэй холбоотой. Одоо хүүхдүүд залилан мэхлэх гэмт хэргийг их үйлдэж байна. Гэмт хэргийг хүүхдүүд ойлгоод, төлөвлөгөө гаргаад үйлдэж байна. Энэ зүйлийг хаанаас сурч байна вэ гэхээр хүрээлэн байгаа орчноос. Иймд эцэг эхчүүд хүүхэддээ тавих хараа хяналтаа сайжруулах шаардлагатай байна. Хүүхдийг хэрхэн хүн болгох вэ гэдэг дээр анхаарах хэрэгтэй.
Цагдаагийн байгууллага, Харилцааны холбооны газартай хамтарч хүүхдийн дугаарыг бүртгэлжүүлэх ажлыг зохион байгуулж байна
Цагдаагийн байгууллага цахим гэмт хэргээс урьдчилан сэргийлэх арга хэмжээний хүрээнд Харилцаа холбооны зохицуулах хороотой хамтран ажиллаж байгаа. Тэд энэ онд багтаан хүүхдийн дугаарыг бүртгэлжүүлэх ажлыг зохион байгуулж байгаа аж. Хүүхдийн гар утсыг бүртгэлжүүлээд, сөрөг хандлагатай сайт руу хандалт хийхгүй байх хаалтыг хийж, Харилцаа холбооны зохицуулах хороо үүнд хяналт тавьж ажиллах юм байна. Харин хүүхдүүд соён гэгээрүүлэх, хичээл номтой холбоотой сайт руу орж хэрэгцээт мэдээ мэдээллээ авах бүрэн боломжтой.
