Эрхтэн шилжүүлэн суулгуулсан иргэдийн спортын III тоглолт энэ сарын 23-нд зохион байгуулагдах билээ. Энэ талаар УНТЭ-ийн ЭЭСНЛ-ийн ЭТЭЭ, АУ-ын доктор Ж.Саранцэцэгээс тодрууллаа.
-Эрхтэн шилжүүлэн суулгуулагсдын спортын тоглолт манай улсад хэзээ эхэлж байв?
-Эрхтэн шилжүүлэн суулгуулсан иргэдийн спортын тоглолт буюу Transplant game нь Монголд анх 2008 онд зохион байгуулагдаж байсан. Английн эрхтэн шилжүүлэн суулгалтын мэс засалч, профессор Маурис Слапак энэхүү тоглолтыг үндэслэсэн байдаг. Дэлхий даяар эрхтэн шилжүүлэн суулгуулсан иргэдийн тоглолтыг зохион байгуулдаг холбоо бий.
Хоёрдугаар тоглолтыг 2015 онд зохион байгуулсан бол, гурав дахь удаагийнхаа тоглолтыг энэ сарын 23-нд хийхээр төлөвлөөд байна.
-Ер нь энэхүү тоглолт зохион байгуулагдах нь ямар ач холбогдолтой вэ?
-Тодорхой нэг өвчний дутагдал нь эцсийн шатандаа ороод гемодиализийн эмчилгээ хийлгэж байгаа хүмүүс, мөн элэгний дутагдалаас болж элэг шилжүүлэн суулгуулсан өвчтнүүдийн эрүүл болсны баяр гэж нэг талаас ойлгож болно.
Мөн эрхтэн шилжүүлэн суулгасан хүмүүсийг сэтгэц, бие махбодын хувьд дэмжиж, сэргээх ач холбогдолтой.
Нөгөө талаас эрхтэн шилжүүлэн суулгалт тухайн хүний амьдрах хугацааг уртасгадаг гэх мэт энэ эмчилгээний давуу талуудыг сурталчилах, тархины үхжилтэй донорын тухай ойлголтыг ард түмэнд түгээх зорилготой юм.
-Олон улсад хэрхэн зохион байгуулагддаг вэ. Мэдээж төрөөс нь дэмжлэг үзүүлдэг байх?
-Эрхтэн шилжүүлэн суулгасан иргэдийн холбоо гэж байдаг. Энэ нь тухайн иргэдийн эрх ашиг, тулгамдаж буй асуудлуудыг нь шийдвэрлэх төрийн бус байгууллага. Олон улсад бас иймэрхүү холбоод байдаг. Эдгээр холбоо нэгдээд дэлхийн эрхтэн шилжүүлэн суулгалтын спортын тоглолтын federation буюу өвөл, зуны тоглолтуудыг зохион байгуулдаг.
Мэдээж тухайн улс бүрийн засгийн газраас нь тодорхой хэмжээний тусламж үзүүлдэг. Гэхдээ ихэвчлэн тухайн холбооноос зардлыг нь гаргана. Манай улсын хувьд өмнөх 2008 оны тоглолтыг тухайн үеийн ерөнхийлөгч асан Н.Энхбаярын ивээл дор зохион байгуулагдаж байсан. 2015 онд гэхэд тодорхой хэмжээгээр төрөөс дэмжиж байсан.
Харин энэ удаа ЭМЯ, Эрүүл мэндийн хөгжлийн төв. Улсын Нэгдүгээр Төв Эмнэлэг, Эрхтэн Шилжүүлэн Суулгалтын Холбоо, болон бусад ивээн тэтгэгч компаниуд хамтран зохион байгуулна.
-Энэ удаагийн спортын III тоглоом өнгөрсөн жилүүдийнхээс ямар онцлогтой вэ?
Өмнөх жилүүдээр бөөр шилжүүлэн суулгасан иргэд түлхүү оролцсон. Энэ удаад элэг шилжүүлэн суулгасан иргэд оролцоно. Ерөнхийдөө спортын тоглолтуудын хувьд нэлээд өргөн хүрээнд болно гэж бид харж байгаа.
Мөн оролцож буй иргэдийн даралтыг үзэж, биеийн байдал нь тогтвортой байгаа эсэхийг харж, тодорхой шалгууруудын үндсэн дээр үргэлжлүүлэн оролцох эсэхийг нь шийдэх юм.