Улаанбаатарын хамгийн гоё үдшийн нэг нь өчигдөр тохиов. Бороо шивэрч, бас “Битлз”-ийн дуунууд хотын төвд намуухан эгшиглэнэ. Б.Цэрэндоржийн гудамж ийм хөл хөдөлгөөнтэй, ийм олон хүнтэй байлгүй нэлээд уджээ. Хашлага, хаалтыг авч, олны очих дуртай гудамж дахин хөл хөдөлгөөд орсон нь нэг талаар хотын захиргааны ач. Нөгөө талаар хашлага хаалтаар далдалж, хоёр оныг үдсэн нь мөн л хотын захиргааныхны шийдвэр байлаа. Өмнөх Засаг даргын үед гаргасан шийдвэрийг өнөөгийг Засаг дарга ийн залруулсан нь энэ билээ. Нэг буруу шийдвэрийг нөгөө нь залруулж байх нь бас сайхан юм даа.

20:00 – Шинэчлэлт засварын ажил нь саяхан дуусч улам гоёмсог болоод байгаа Цэрэндоржийн гудамжны нээлтэд болов. Нийслэлийн Засаг дарга бөгөөд Улаанбаатар хотын захирагч С.Батболд гудамжийн нээлтэд зориулан үг хэлж байлаа. Тэрбээр “Ийм гудамж талбай олонтой Улаанбаатар болгохын төлөө ажиллана” гэлээ.

20:30 – Бороо шивэрч байлаа. Иргэд ч олон цуглав. Тэдгээрийн ихэнх нь 40-60 насныхан байлаа. Учир нь Английн домогт “Beatles” хамтлагийн “Yesterday” дуу хөшөөнийхөө дэргэд эгшиглээд эхэлжээ. 24 дүгээр сургуулийн төгсөгч, дуучин, гитарчин Бааяа “Beatles” хамтлагийн хит дуунуудыг дуулах ажээ. Анх 1960 онд Жон Леннон, Пол Маккартни, Жорж Харрисон, Стюарт Сатклифф, Пит Бест гэсэн таван хүний бүрэлдэхүүнтэйгээр Английн Ливерпүүл хотноо байгуулагдаж байсан тус хамтлаг 1960-1970  оны хооронд 10 гаруй цомгийг гаргаад амжсан билээ. Хэдийгээр аравхан жил бүтээлээ туурвисан ч тэдний дуунууд өнөөг хүртэл бидний шимтэн сонсдог дуу хэвээр байгаа. Хамтлагийн дуунуудыг хамгийн ихээр шимтэн сонсдог үеийнхэн бол өдгөө 40-60 насныхан гарцаагүй мөн юм. Бас Б.Цэрэндоржийн гудамж бол Монголын “Beatles”-ын фэнүүдийн хувьд дурсамж, дурдатгал, хүүхэд нас нь билээ.  Энэ үдэш тэднийх байх нь аргагүй.

“Beatles”ийн While My Guitar Gently Weeps,Yellow Submarine, Something, I Feel Fine, Lady Modonna, And I Love Her, Hello Goodbye, In My Life зэрэг дуунууд хэдийн дуулагдлаа. Аянд нь зогсолтгүй “Манга” татан бүжих олонд нэн таатай байгаа нь уур амьсгалаас илт мэдэгдэж байлаа.

21:00- “Beatles”-ын “Rain” дуу явж эхэлмэгц зөөлхөн шивэрч байсан бороо ширүүслээ. Энэ үед тус хамтлагийн жинхэнэ шүтэн бишрэгч нар болох ахимаг насныхан үлдлээ. Төд удалгүй бороо намжив.

21:20 – Гитарчин, дуучин Бааяа тайзнаа “Өргөө” хамтлагийн дуучин И.Болоожийг урив. Тэрээр тайзнаа Алтан зул, Дандаа чамайг хайрлаж явья дууг тус тус дуулав. Үргэлжлүүлэн “Beatles” дуулагдав.  

Энэ үеэр энд хүрэлцэн ирсэн иргэдээс шинэчлэн, засварлагдсан гудамжны нээлтийн талаарх сэтгэгдэлийг сонслоо.

Г.Гансүх “Саяхан л бид айдастай байлаа. Гэхдээ өнөөдөр ийм сайхан тохижуулалттай гудамжийг хүлээлгэн өгч байгаад сэтгэл өөдрөг, сайхан байна аа. Бас “Beatles”-ийн дуунууд эгшиглэж байгаа нь өнөөдрийг чимж байна. Магадгүй амралтын өдрөөр нээсэн бол илүү олон хүн ирж үзэх байсан байх аа” гэлээ.

Э.Доржсүрэн: “Багаасаа л энэ гудамжаар тоглож наадаж өссөн. Харин хэдэн сар хашаатай байгаад байсан. Одоо бид урьдын адил энэ сайхан гудамжаар зугаалж болохоор болсонд баяртай байна” гэв.

Нийслэлчүүдийн хэлж заншсанаар “Фонтан” буюу Ерөнхий сайд Б.Цэрэндоржийн гудамж ийнхүү тайван орчинг бүрдүүлжээ. Тус гудамжинд шинэ боржин чулуу, орчин үеийн шийдэл бүхий усан оргилуурыг ашиглалтад оруулжээ. Мөн шинээр зүлэг, суулгаж хэлбэржүүлэлт хийжээ. Нээлтэд ирсэн иргэдийн инээд хөөрөөс ажихад энэ гудамжны шинэчлэлт засварыг шууд дүгнэж болохоор санагдлаа.

Л.Сайнбаяр