Монголд хамгийн анхны түрээсийн дугуй үйлчилгээний нээлт өчигдөр боллоо. Уг үйлчилгээг Нийслэлийн агаарын бохирдол болон авто замын түгжрэлийг бууруулах, нийслэлийн иргэдийн эрүүл мэндийг дэмжих, цаг завыг хэмнэх зорилгоор Никель Ганбаа санаачлан НЗДТГазар, Петровис, Хас банктай хамтран хэрэгжүүлж байгаа юм.
Өнөөдрийн байдлаар 250 ширхэг түрээсийн дугуйг баруун дөрвөн зам- зүүн дөрвөн зам, урагшаа Зайсан Хилл, хойшоо Хүүхдийн урлан бүтээх төв гэсэн тойрог дотор түрээслэн унах боломжтой бөгөөд UBike-ийн 10 байршилд буй зогсоолын хаана ч тавих боломжтой юм байна.
“Энэ түрээсийн дугуйг монголд үйлдвэрлэсэн бөгөөд монгол хүний бие, монгол замд тохируулж хийсэн. Техник технологийн дэвшилтэт хөгжлийг ашиглан хийснээр төлбөр, тооцоо болон хяналтын бүрэн ухаалаг системтэйн дээр Нийслэлийн Цагдаагийн газартай хамтран ажиллаж байгаа болохоор хулгайд алдагдана гэсэн ойлголт байхгүй. Түрээсийн дугуйн үйлчилгээ 10 дугаар сар хүртэл ажиллах бөгөөд ирэх хавар дөрөвдүгээр сараас ашиглах боломжтой” хэмээн "Никел Ганбаа" компанийг үүсгэн байгуулагч Г.Дашням ярилаа.
“Түрээсийн дугуй төсөл 3 үе шаттай хэрэгжинэ. I-р шат 2020 он гэхэд 150 зогсоолтой хоёр мянган ширхэг ундаг дугуй 2021-2026 онд 250 зогсоолтой 2500 ширхэг цахилгаан ундаг дугуй 2027-2033 онд 5000 ширхэг цахилгаан ундаг дугуй нэвтрүүлэхээр төлөвлөсөн” хэмээн Нийслэлийн Засаг дарга С.Батболд хэллээ.
“Никел Ганбаа” компанийг үүсгэн байгуулагч Г.Дашням уг үйлчилгээг сонирхсон иргэдэд дугуйныхаа ач холбогдлын талаар үнэтэй зөвлөгөөг өгч байлаа. Иргэд ч унадаг дугуйг унаж, сонирхож байв.
Түрээсийн дугуй нь төлбөрийн хувьд 30 минут нь 500 төгрөг, нэг цаг нь 1000 төгрөгийн үнэтэй байх бөгөөд өглөө 07:00-22:00 цагийн хооронд ажиллах юм.
Түрээсийн дугуйг ашиглахдаа эхлээд “UBIKE Ulaanbaatar” аппликейшнийг утсандаа суулгаж бүртгүүлэх бөгөөд анх бүртгүүлэхдээ 10.000 төгрөгийн хураамж төлөх юм байна. Үүний дараа дансаа цэнэглэж, өөрт ойрхон зогсоолоос QR кодыг уншуулан түгжээг тайлснаар дугуйг унах боломжтой болох юм байна. Дугуйг унаж дуусаад түгжээг гараар түгжсэний дараа таны төлбөр зогсоно түгжээгүй тохиолдолд дансандаа байршуулсан мөнгөнөөс нь хасагдсаар байх юм.
Түрээсийн дугуй нь дараах газруудад байршиж байгаа юм.
- Д.Сүхбаатарын талбай
- 120мянгат
- Хүүхдийн зуу
- Тedу худалдааны төв
- Цэцэг төв
- Багшийн дээд UBH цэнтр
- Баруун дөрвөн зам
- Зайсан
- Зүүн дөрвөн зам
- Хүүхдийн урлан бүтээх төв
Түрээсийн дугуйн үйлчилгээний нээлтийн үеэр Нийслэлийн Засаг дарга С.Батболд “Улаанбаатар хот дэлхийн 455 метрополитин хотын нэг гэдэг утгаараа орчин үеийн нийтийн тээврийн үйлчилгээг шат дараатай нэвтрүүлж байгаа юм. Тун удахгүй үйлчилгээний соёл технологийн дэвшлийг өөртөө шингээж дэлхийн стандартын шаардлагыг бүрэн хангасан UCab нэртэй такси үйлчилгээ нийслэлийн иргэдэд үйлчилж эхлэх болно” хэмээж байсан.
Тэртээ 1965 онд анх Голландын Амстердам хотод үүсч өдгөө дэлхийн 600 хотыг эгнээндээ багтаасан уг үйлчилгээ Монголд нэвтэрч байгаа нь маш олзуурхууштай. Бид энэ үйлчилгээг өдөр тутам хэрэглэж заншсанаар замын түгжрэл буурхаас гадна нийслэлчүүдэд дутагдаад байгаа дасгал хөдөлгөөн нөхөгдөж, чийрэгжих гэх мэт сайн талууд ихтэй юм хэмээн баяртай буцлаа.
Р.Хишигжаргал