Дархан-Улаанбаатар чиглэлийн замд өнгөрсөн дөрөв хоногт 16 хүн амиа алдсан байна. Үүний гурав нь хүүхэд байжээ. Мөн 23 хүн гэмтэж бэртсэнээс 11 тахир дутуу болоод байна. Энэ тоо бол зөвхөн дөрөвхөн хоногийн л мэдээ.
Энэ чиглэлийн замд Монгол Улсын аж үйлдвэрийн томоохон төв, газар тариалан, мал аж ахуй, эдийн засгийн гол бүс нутаг, аялал жуулчлалын бааз, амралт, сувиллын газрууд байдаг бөгөөд дээрх амралтын газрыг зорьсон амрагчид, мөн Булган, Хөвсгөл, Эрдэнэт, Сэлэнгийн чиглэлийн зорчигчид дайран өнгөрдөг юм. Тус замаар хоногт 8000 тээврийн хэрэгсэл зорчдог ч стандартад зааснаар бол 600 орчим автомашин зорчих ёстой ажээ.
Өнгөрсөн оны зургадугаар сарын 21-нд “Улаанбаатар-Дархан” чиглэлийн 204.6 километр автозамын өргөтгөл шинэчлэлийн ажлыг эхлүүлж, тухайн үед салбарын сайд байсан Д.Ганбат тус замыг цемент бетон хатуу хучилттай, дөрвөн эгнээтэй I зэрэглэлийн зам болгох ажил эхлүүлж байна" хэмээн мэдэгдэж байсан. Гэвч өнгөрөгч гуравдугаар сард Засгийн газрын хуралдаанаар уг чиглэлийн замыг шинэчлэх төслийг “Төрийн өмчийн концессын жагсаалт”-аас хасч, сонгон шалгаруулалтыг хүчингүйд тооцохоор болсон юм. Учир нь Засгийн газар, Азийн хөгжлийн банк хооронд байгуулах санхүүгийн ерөнхий хэлэлцээрийн дагуу 2017-2018 онд хуваарилсан зээлийн хөрөнгөөр хэрэгжүүлэх төсөл, хөтөлбөрийн хүрээнд Улаанбаатар-Дархан чиглэлийн 204 километр, Дархан-Алтанбулаг чиглэлийн 113 километр авто замд их засвар, шинэчлэл хийх байсан боловч хэлэлцээр амжилтгүй болсноор санхүүжилт зогсчээ.
Дархан, Сэлэнгэ-Улаанбаатар чиглэлд өдөр бүр зорчигч тээвэрлэдэг таксины жолооч нар олон бий. Тэдний нэг жолооч Т.Мөнхбаяр, "Дарханы зам үнэхээр хэцүү болсон. Жолооч нар хурдтай явж байгаад гэнэт нүх таарахад огцом тоормосолдог, тэгэхэд арын машин мөргөнө. Нүх таарахад огцом дарах зэргээс болж осол маш их гарч, жилдээ олон зуун хүн амиа алдаж байна" хэмээн ярилаа. Харин жолооч Жагаа "нөхөөсийг хавар, намар болгон хийдэг. Одоо ч нөхөөс хийж л байна. Тэр нөхөөс нь энэ зун биш юм гэхэд, ирэх намар л унана. Одоо хийвэл чанартай л юм хиймээр байна. Дарга нар өөрсдөө Зайсан руугаа хачин гоё өргөн, тэмдэглэгээтэй зам тавиулсан байна лээ. Дархан руу ийм зам тавьчхаж болдоггүй юм байх даа" хэмээлээ.
Улаанбаатар-Дархан чиглэлийн зам нь 1970-1980 онд баригдсан бөгөөд 1997-2000 онд хийсэн ээлжит засвараас өөр их засвар хийгдээгүй 18 жил болж байгаа учир замын суурь, хучилт их хэмжээгээр эвдрээд байгаа юм. Өөрчлөлт шинэчлэлт хийлгүй олон жилийн нүүрийг үзэж байгаа энэ замд бид эрдэнэт хүнийхээ алтан амийг цаг бусаар алдсаар л байх уу? Энэ Засгийн газрын давын өмнө хийх ажил нь Дарханы замыг засах юм уг нь.
Р.Хишигжаргал
Сэтгэгдэл (3)