Замын цагдаагийн алба хаагчдын мэргэжлийн ур чадварыг өсгөн нэмэгдүүлэх, тэдний нийгмийн асуудалд дэмжлэг, туслалцаа үзүүлэх, биеийн тамир, спорт, урлаг, гоо зүйн мэдрэмжийг дээшлүүлэх, алба хаагчдын гэр бүлийн гишүүд болон албаны хамтын ажиллагааг сайжруулж шинэ түвшинд гаргах, тэдний үүрэг оролцоог нэмэгдүүлэх, албаны үйл ажиллагааг сурталчлан таниулах, чөлөөт цагийг зөв боловсон өнгөрүүлэх зорилгоор Нийслэлийн Засаг даргын тамгын газартай хамтран Замын цагдаагийн албанаас “Чадварлаг хамт олон-2018” шалгаруулах цогцолбор тэмцээнийг өнөөдөр зохион байгууллаа.
Тав дахь жилдээ зохион байгуулж байгаа тус арга хэмжээнд алба хаагчид нийт 10 төрлийн тэмцээнд долоон сарын хугацаанд өрсөлджээ. Өнөөдөр сүүлийн төрөл болох “Аха” тэмцээнээ зохиож нийлбэр дүнгээ гаргасан юм.
Тэмцээнд тус албаны нийт 19 харъяа газар, хэлтэс, нэгжийн 11 багийн тамирчин, алба хаагчид сагсан бөмбөг, биллъяард, гар бөмбөг, дартс, ширээний теннис, усан сэлэлт, дуу хөгжим, яруу найраг, албаны шуурхай бэлэн байдал, хөл бөмбөг, АХА гэсэн төрлөөр өрсөлдөж багийн нийлбэр дүнгээр Тэргүүн байранд таван хэлтсийн хамтарсан “Оргил” багийн хамт олон 32 оноогоор, хоёрдугаар байранд Хан-Уул дүүрэг дэх Замын цагдаагийн хэлтсийн алба хаагчид 38 оноогоор, гуравдугаар байранд Баянгол дүүрэг дэх Замын цагдаагийн хэлтсийн хамт олон 49 оноогоор тус тус шалгарлаа.
Б.Цэрэнлхам