Өнгөрсөн долоо хоногт болж өнгөрсөн онцлох үйл явдлуудыг тоймлон хүргэж байна.
Монгол Улсын Засгийн газар Япон улсад хүмүүнлэгийн тусламж үзүүлэхээр шийдвэрлэв
Гадаад харилцааны сайд Д.Цогтбаатар өнөөдөр Япон Улсаас Монгол Улсад суугаа Онц бөгөөд Бүрэн эрхт Элчин сайд М.Такаока-г хүлээн авч уулзан, Япон Улсын баруун бүст үерийн гамшиг тохиолдсонтой холбогдуулан Монгол Улсын Засгийн газраас Япон Улсад нэг зуун мянган ам.долларын хүмүүнлэгийн тусламж үзүүлэхээр шийдвэрлэснийг мэдэгдэв.
Цэц 42 дугаар тойргийн нөхөн сонгуулийн асуудлыг хэлэлцэж байна
Үндсэн хуулийн цэц хуралдаж байна. Тодруулбал, Цэцэд нэр бүхий гурван иргэн УИХ-ын 42 дугаар тойрогт явуулах нөхөн сонгуультай холбоотой асуудлаар гомдол гаргажээ.
УИХ-ын хаврын чуулганы төгсгөлд Хэнтий аймгийн 42 дугаар тойрогт болох нөхөн сонгуулийн товыг тогтоосон.Ингэхдээ аравдугаар сарын 7-ны өдөр байхаар тогтож,бэлтгэл ажлыг хангахыг холбогдох албаныханд даалгаад байгаа билээ.
Ерөнхийлөгч ээлжит бус чуулган хуралдуулах албан бичиг хүргүүлэв
Ерөнхийлөгч Х.Баттулга өнөөдөр УИХ-ын дарга М.Энхболдод ээлжит бус чуулган зарлан хуралдуулах тухай албан бичиг хүргүүлжээ.
Ээлжит бус чуулганыг зарлан хуралдуулах тухай албан бичигт:
“Улсын Их Хурлын нэр бүхий 26 гишүүн “төрийн албыг арилжаалсан “60 тэрбумын” зэрэг авлига, албан тушаалын томоохон асуудлууд Авлигатай тэмцэх газарт очоод замхран дарагддаг, тус газрын дарга Х.Энхжаргал авлигатай тэмцэх үүрэг бүхий төрийн тусгай байгууллагын хуульд заасан чиг үүргийг хэрэгжүүлэн ажиллаж чадахгүй байгаа тул цаашид уг албан тушаалыг хаших боломжгүй гэж үзэн Монгол Улсын Их Хурлын 2016 оны 07 дугаар сарын 08-ны өдрийн 07 дугаар тогтоолыг хүчингүй болгох асуудлаар Улсын Их Хурлын ээлжит бус чуулганыг зарлан хуралдуулах шаардлага” бүхий албан бичгийг 2018 оны 07 дугаар сарын 10-ны өдөр ирүүллээ.
Аялал жуулчлалын салбараас 400 гаруй сая доллар олжээ
Засгийн газар 2020 он гэхэд манай улсад жилд ирэх жуулчны тоог нэг саяд хүргэж, нэг тэрбум хүртэл ам.долларын орлого олох зорилт тавьсан. Ингэхийн тулд гурван жилийн хугацаанд жуулчдын тоог тогтмол 30 хувиар өсгөх шаардлага үүсчээ.
ОУВС орон сууцны үнийн индексийн асуудлаар зөвлөгөө өгнө
Манай улс ОУВС-гийн “Өргөтгөсөн санхүүжилтийн хөтөлбөр”-т өнгөрсөн оноос хамрагдаж эхэлсэн. Тус сангаас орон сууцны үнийн статистикийг сайжруулах, энэ чиглэлээр сургалт зохион байгуулах, хэрэглээний болон үйлчилгээний салбаруудын үйлдвэрлэгчийн үнийн индексийн тооцоог сайжруулах чиглэлээр зөвлөмж өгч, бодитой ажлуудыг хэрэгжүүлэхээр болжээ.
Өр өмнөх оныхоос 18.2 хувиар өсчээ
Хэрэглээний зээлийг дагаад өрхийн нийт өр өмнөх оны мөн үеэс 18.2 хувиар өсч 9.6 их наяд төгрөгт хүрсэн нь банкны салбарын нийт зээлийн 57.6, үүнээс хэрэглээний зээл нь 23 хувийг бүрдүүлж байна. Мөн хэрэглээний шинжтэй импорт эхний улирлын байдлаар өнгөрсөн оноос 28 хувиар өсчээ. Өрхийн өрийг ДНБ-д харьцуулсан харьцаа 34 хувь, үүний тал хувийг хэрэглээний зориулалттай зээл бүрдүүлж байна.
АНУ-ын баруун хойд номхон далайн Үндэсний Лабораторийн төлөөлөгчдийг хүлээн авч уулзав
МХЕГ-ын дэд дарга Д.Энхсайхан АНУ-ын Эрчим хүчний яамны Баруун хойд Номхон далайн Үндэсний лабораторийн төлөөлөгч, сургагч багш нарыг хүлээн авч уулзлаа. Сургагч багш нар цацрагийн хяналтын улсын байцаагч нарыг мэргэшүүлэх, үндэсний хэмжээний сургагч багш бэлтгэх (T3) сургалтыг 2018 оны 7 сарын 16-наас 21-ны өдрүүдэд Улаанбаатар хотод зохион байгуулна.
"БИД МАРТАХГҮЙ” хүндэтгэлийн өдөр тохиож байна
Цагдаагийн байгууллага үүсгэн байгуулагдсаны түүхт 97 жилийн ойн хүрээнд Замын цагдаагийн албанаас“Бид мартахгүй” арга хэмжээг өнөөдөр зохион байгууллаа.
Уг арга хэмжээг алба хаагчдын ажил үүрэг, үйлсийг таниулах, албан үүргээ гүйцэтгэж яваад амь үрэгдсэн алба хаагчдынхаа гэгээн дурсгалыг хүндэтгэх, үйл хэргийг нь мөнхжүүлэх, тэдний гэр бүл, төрөл төрөгсдөд хүндэтгэл үзүүлэх зорилготойгоорзохион байгуулж байгаа юм байна.
Хөнгөлөлттэй үнээр олгох эмийн жагсаалтыг шинэчиллээ
Эрүүл мэндийн даатгалын үндэсний зөвлөлийн ээлжит хурлаар “Эрүүл мэндийн даатгалын сангаас үнийн хөнгөлөлт үзүүлэх зайлшгүй шаардлагатай эмийн нэр төрөл, үнийн дээд хязгаар, хөнгөлөх хэмжээ”-г шинэчлэн баталсан. Үүний дагуу өргөн хэрэглэдэг эмийн нэр, төрөл, хөнгөлөх хувь хэмжээг эмийн хүртээмжтэй уялдуулан тогтоосон жагсаалтыг долдугаар сарын 16-наас мөрдөж байгаа юм.
Төрөлт 7.8 хувиар нэмэгджээ
Улсын хэмжээнд 2018 оны эхний хагас жилд 38055 эх амаржиж, 38310 хүүхэд төрүүлсэн нь өмнөх оны мөн үеэс амаржсан эх 2743 буюу 7.8 хувиар, төрсөн хүүхэд 2774 буюу 7.8 хувиар тус тус өсжээ. Мөн нас баралт 8515 болж, өмнөх оны мөн үеэс 770 буюу 9.9 хувиар нэмэгджээ.
Энэ оны эхний хагас жилд 1000 хүнд ногдох төрөлт 11.9 хувь , нас баралт 2.7 хувь , ердийн цэвэр өсөлт 9.2 хувь байна.
Айл өрхүүдийн бохирыг халдваргүйжүүлэх ажлыг МАЕГ-т үүрэг болголоо
Нийслэлийн нутаг дэвсгэрт сүүлийн өдрүүдэд орсон борооны улмаас үүссэн нөхцөл байдал болон үүнтэй холбоотой авч хэрэгжүүлсэн арга хэмжээ, цаашид хийж хэрэгжүүлэх ажлын талаар Улаанбаатар хотын Ерөнхий менежер бөгөөд Захирагчийн ажлын албаны дарга, нийслэлийн Онцгой комиссын үер ус, цаг агаарын аюулт үзэгдлийн үед ажиллах шуурхай хэсгийн дарга, хурандаа Т.Гантөмөрөөр ахлуулсан ажлын хэсэг хуралдлаа.
Боксын дасгалжуулагчдад "Нэг од" олгов
Монголын боксын холбооноос дасгалжуулагчдынхаа зэрэг чансааг ахиулах ажлын хүрээнд AIBA буюу Олон улсын боксын холбооны дасгалжуулагчийн "Нэг од" олгох семинарыг эх орондоо буюу спортын төв ордонд зохион байгуулж байна. Семинарыг Олон улсын боксын холбоо (AIBA)-ийн дасгалжуулагчдын зөвлөлийн дарга Польш улсын иргэн Адам Кусиор удирдан явуулж байна.
Баян-Өлгий аймаг руу тусламжийн цуваа хөдөллөө
Улсын Онцгой комиссын 07 дугаар сарын 19-ний өдрийн хуралдаанаар Баян-Өлгий аймагт таван ханатай гэр 80ш, бохирын болон ус зөөвөрлөх машин, эмнэлэгийн машин, ковш зэргийг Улсын нөөцийн сангаас олгохоор шийдвэрлэсэн юм.
Тус шийдвэрийн дагуу өнөөдөр Баян-Өлгий аймгийн ард иргэдэд үзүүлэх хүмүүнлэгийн тусламжийн цуваа хөдөллөө.
Г.Сарангэрэлд гурван жилийн ял оноолоо
Хар тамхины хэргээр шалгагдаж байсан Г.Сарангэрэлийг шүүх хурал өнөөдөр /2018.07.20/ Баянзүрх, дүүргийн эрүүгийн хэргийн анхан шатны шүүхэд боллоо. Шүүхээс түүнд Мансууруулах эм, сэтгэцэд нөлөөт бодис болох метафетамины агууламжтай сэтгэцэд нөлөөлөх бодисыг худалдаалах зорилгоор хууль бусаар олж авсан, өөрийн биедээ нууж хадгалсан, тээвэрлэсэн гэмт хэрэг үйлдсэн гэмт буруутайд тооцож Эрүүгийн хуулийн тусгай ангийн 20.7 дугаар зүйлийн 2-д зааснаар гурван жилийн хорих ялыг нээлттэй хорих байгууллагад эдлүүлэхээр шийдвэрлэсэн байна.
“What3word” хамтын ажиллагаанд гарын үсэг зурлаа
Монгол Улсын Засгийн газар, Байгаль Орчин, Аялал жуулчлалын Яам /БОХЖЯ/ монгол улсын аялал жуулчлалын тогтвортой байдлыг хөгжүүлэх, аялал жуулчлалын төв цэг болгохоор ажиллаж байгаа билээ. Энэ хүрээнд БОАЖЯ, Их Британи улсын “ what3word” буюу гурван үгт хаяглалтын системтэй хамтран ажиллах санамж бичигт өнөөдөр гарын үсэг зурлаа.
Булган аймгийн иргэн О.Болдсайхан зургаан хүний амь амарлаа
Булган аймгийн Тэшиг сумын иргэн О.Болдсайхан усанд осолдох дөхсөн 6 хүний амь насыг аварсан сайхан үйлс бүтээжээ.
Тус сумын Эгийн голын Энтийн гарам хавьд модон завиар ус гатлах гэж яваад завь нь хөмөрч усанд унасан хүмүүс аврал эрсэн байна. Тэр үед ойрхон байсан иргэн О.Болдсайхан сэлж очин том хүн, хүүхэд нийлсэн 6 хүний амийг нь аварсан талаар ЦЕГ-аас мэдээллээ.
Аваргуудыг Г.Өсөхбаяр, Заануудыг Н.Жаргалбаяр тэргүүлж байна
Монголын Үндэсний Бөхийн холбооноос гаргасан бөхчүүдийн шинэчлэгдсэн эрэмбийг хүргэж байна.
Б.Цэрэнлхам
