Улсын Ерөнхий прокуророос УИХ-ын гишүүн Б.Батзоригийн бүрэн эрхийг түдгэлзүүлэх хүсэлтээ өчигдөр УИХ-д өргөн барьсан. Үүнийг УИХ 48 цагийн дотор хэлэлцэн шийдвэрлэх ёстой. УИХ-ын гишүүний бүрэн эрхийг түдгэлзүүлэх эсэх асуудлыг эхлээд Халдашгүй байдлын дэд хороогоор хэлэлцээд Хууль зүйн болон Төрийн байгуулалтын байнгын хороогоор оруулах хуулийн заалттай. Эдгээр байнгын, болон дэд хорооны санал дүгнэлтийг үндэслэн УИХ-ын чуулганы нэгдсэн хуралдаанаар хэлэлцэн эцэслэн шийдвэрлэхдээ нууц санал хураалт явуулдаг. Б.Батзориг гишүүний бүрэн эрхийг түдгэлзүүлэх эсэх эхний санал санал дүгнэлтийг гаргах УИХ-ын халдашгүй байдлын дэд хороо өнөөдөр хуралдана. Энэ дэд хороог УИХ-д хамгийн олон удаа сонгогдсон таван гишүүн бүрдүүлдэг бөгөөд Улсын Их Хурлыг хугацаанаас нь өмнө тараах, гишүүний бүрэн эрхийг түдгэлзүүлэх, эгүүлэн татах талаар хуульд заасан эрх бүхий байгууллага, албан тушаалтнаас Улсын Их Хуралд ирүүлсэн саналыг судалж санал, дүгнэлт гарган зохих Байнгын хорооны болон нэгдсэн хуралдаанд оруулах үндсэн үүрэгтэй байдаг. Энэ удаагийн парламентийн Халдашгүй байдлын дэд хорооны бүрэлдэхүүнд гишүүн Ц.Нямдорж, Д.Лүндээжанцан, Ч.Улаан, Ө.Энхтүвшин, Н.Энхболд нар багтдаг билээ.
С.Нацагтовуу
Сэтгэгдэл (8)